Tiga kedai di Limbang bela dikompaun RM1000

LIMBANG: Tiga buah kedai ditu bela dikompaun RM1,000 ketegal ngelanggar atur nyerumba Op Covid-19.

Ketuai Polis Pelilih Limbang, Superintenden Abang Zainal Abidin Abang Ahmad madah sida ti beumur entara 40 enggau 50 taun nya ditemu ngelanggar atur lebuh Op COVID-19 berengkah ari pukul 10.30 pagi ngagai 12 tengahari.

Ku Zainal, ketetiga pengempu kedai nya enda ngerikod penerang penguna ti datai kia baka ti udah dipadah sebedau tu.

“Sida neritka Atur Pengawa Standard Covid-19 ngagai mensia mayuh enggau pengempu kedai di pelilih tu.

“Ketetiga pengempu kedai nya dikompaun RM1,000 laban ngereja penyalah enda ngerikod penerang bala penguna ti tama kia,” ku iya nerang.

Nambahka nya ku Zainal, sida diukum dibaruh Seksyen 269 Kanun Keseksaan, Peraturan 10 Peraturan-Peraturan Pencegahan Dan Pengawalan Penyakit Berjangkit (Langkah-Langkah Di Dalam Kawasan Tempatan Jangkitan) (No.7) 2020.

“Taja pia, sida tiga udah mayar kompaun nya,” tandu iya.

Operasyen lebuh nya dipejalai Ketuai Unit Penyaga Pengelantang Mensia Mayuh Indu Opis Polis (IPD) Pelilih Limbang, ASP Khairul Ridzuan Ahmad begulai enggau tiga kaban polis ngelingi mengeri tu.

Suara Sarawak