Tiga kes angus kandang seminggu

KUCHING: Tiga kes penusah angus rumah panjai udah dirikod dalam timpuh seminggu aja.

Ku Pemantu Direktor Operasyen Opis Bomba enggau Penyah Penusah Sarawak Tiong Ling Hii, penusah angus rumah panjai udah nabanka siku nyawa lalu ngujungka dua orang bakal.

“Tiga kes penusah angus rumah panjai tu mungkur 89 pintu lalu 798 iku nadai rumah endur diau,” ku iya.

Penusah nyadi 14 April tu tadi ngujungka Rumah Chandi di Sungai Tau Selangau angus lengis sereta siku indu OKU bebadi nyawa, siku betu enggau 230 iku ke bukai nadai endur diau.

Enda datai 24 jam pengudah penusah di Selangau, lemai 15 April, menua kitai begau baru ke penusah nuntung dua luntang rumah panjai di Uma Bawang Sungai Asap ke alai 42 pintu angus lengis saraya 407 iku ngenduh ba rumah kaban belayan sereta siku betu.

Lalu penusah ke baru nyadi malam ensanus, 18 April ke alai 25 pintu di Ulu Bauh Celon Selangau angus lengis ngasuh kitai balat irau.

Penusah kepenudi tu ngujungka 161 peranak tasah nadai endur diau. Taja pia nadai penusah bebadi nyawa enggau bakal nyadi ba penusah sekali tu.

“Naka bulan April taun tu aja, bisi empat kes rumah panjai angus nyadi lalu penusah keterubah dirikod 15 Januari tu tadi.

“Penusah 20 pintu bilik Rumah Panjai Buyong, Jalai Lidong di Betong angus tang mujur dirara sida serumah,” ku iya.

Suara Sarawak