Tiga kes pemati baru Covid-19 di Sarawak

KUCHING: Tiga kes pemati baru ketegal Covid-19 ngaul dua iku indu enggau siku lelaki dirikodka ba Sarawak sehari tu.

Komiti Penyangga Penusah Ngenyit Nengeri (JPBN) dalam siti penerang media lemai tu tadi madahka tu ngujungka pemati ketegal Covid-19 ba menua tu manggai 61 iku.

Semua kes pemati ke baru tu dirikodka ba pelilih Sibu ngaul indu beumur 52 taun enggau 73 taun sereta siku lelaki ke beumur 63 taun.

Nitihka penerang JPBN, ba kes pemati ke-59 nya mungkur siku indu peranak menua (Sarawak) beumur 52 taun dipasuk berubat ba Sepital Sibu ketegal sendat seput. Udah nya pengudah diperesa rt-PCR kena 27 Januari mandangka pemutus iya kena rampit Covid-19 kena 28 Januari.

Bekau ari nya, tikas pengerai iya majak kusut sereta dikenuku udah nadai kena 13 Februari tu tadi. Kes tu ngembuan rikod ko-morbid penyakit darah tinggi, kemi manis enggau penanggul tungkul sengayuh.

Udah nya, ungkup kes pemati ke-60 mega mungkus siku indu peranak menua tu (Sarawak) beumur 73 taun dipasuk berubat ba Sepital Sibu ketegal penanggul sendat seput. Asil peresa rt-PCR kena 28 Jan iya ditemu kena rampit penyakit tu ba pemutus ke dipeda hari siti iya nya 28 Jan.

Beduduk ari nya, tikas pengerai tudah indu tu majak kusut lalu iya diripotka bebadi nyawa kena 13 Februari tu tadi. Kes mega bisi rikod ko-morbid baka penyakit kemi manis, darah tinggi enggau penyakit jantung. Nitihka penerang mega madahka kes tu dirampit ari Kluster Pasai.

Nangkan ke nya, ba kes pemati ke-61 mungkur siku lelaki mega peranak menua tu (Sarawak) ke beumur 63 taun. Tudah lelaki tu dipasuk berubat ba Sepital Sibu ketegal penanggul sendat seput. Bekau ari nya, peresa rt-PCR terus digaga lalu iya dikenuku kena rampit penyakit tu 13 Januari tu tadi. Kes endang bisi rikod ko-morbid penyakit darah tinggi enggau dislipedemia. Lelaki tu mega diripotka kena rampit ari Kluster Pasai.

Kelimpah ari nya, Sarawak sehari tu mega ngerikodka 161 kes positif baru Covid-19 ba Subis (60), Sibu (45), Bintulu (16), Kapit (15), Samarahan (12), Miri (5), Julau (2), Kuching (1), Sri Aman (1), Saratok (1), Pakan (1), Beluru (1) enggau Kanowit (1).

Tu ngujungka penyampau kes positif Covid-19 di menua nambah 6,586 kes.

Ungkup penerang, semua 60 kes ti dirikodka ba Subis ngaul Kluster Pasai ari sub-kluster Tangap.

Naka tu, Sarawak agi ngerikodka 16 kluster agi ngerekai iya nya Kluster Nanga Lijan, Kluster Seruas, Kluster Sebangkoi, Kluster Jun Heng, Kluster Bintang Daily, Kluster Jalan Pengiran, Kluster Tabong, Kluster Indah Riang, Kluster Bedayan, Kluster Rakut, Kluster Bukit Sekubong, Kluster Jelita, Kluster Pasai, Kluster Keranji Tabuan, Kluster Bah Sayap enggau Kluster Stutong.

Suara Sarawak