KUCHING: Pengawa ngatur program meri vaksin ba Dun Tupong meri fokus ngagai tiga pekara pemadu beguna sereta diatur dua tauka tiga hari tumu ari perambu.
Adun Tupong Fazzrudin Abdul Rahman madahka, entara pekara pemadu diguna sida lebuh ngatur program tu, iya nya raban ti bedau kala berejister ba MySejahtera, raban ti udah ngerejister MySejahtera tang bedau divaksin enggau raban ti udah ngerejister diri tauka bedau ngerejister MySejahtera tang enda ulih mindah ngagai Palan Meri Vaksin (PPV).
“Udah bulih semua penerang tu, kami deka baum sebedau ngaga pemutus zon ni ti deka dilawa.
“Semua penerang ti diambi balat dinamik laban penerang ti diambi kami ulih berubah sebarang maya,” ku iya.
Fazzrudin bejaku munyi nya lebuh ditanya pemberita ba Program Mobil Vaksin Mindah (Mobil Vaksin Bergerak) di Palan Meri Vaksin (PPV) Balai Mensia Mayuh Matang ditu, kemari.
Tandu iya, pekara tu dipeda dinamik laban siku peranak ti madahka iya bedau nerima vaksin tau berubah nerima vaksin tauka semaya divaksin dalam MySejahtera sebarang maya.
“Nya alai, atur program tu enda ulih diperambu seminggu, kami ngena awak dua tauka tiga hari ngatur program tu nentuka penyampau enggau zon ni ti deka dituju.
“Kebuah pia, laban vaksin ti udah dibuka nya mesti ditembuka dalam timpuh beberapa jam aja.
“Aku gaga laban program ketiga bisi nunjukka kelai ti amat manah enti dibanding enggau program keterubah sereta kedua apin lama,” ku iya.
Dulu ari nya, Chairman Pengatur Program Mobil Vaksin Mindah ti mega Mandal Tuai PBB Pampang Tupong Senator Zaiedi Suhaili madahka sida nagit 1,000 iku orang ulih nerima vaksin kemari.
“Diatu (naka tengah hari kemari) lebih 500 iku udah ngerejister nerima vaksin lalu kami melaba agi mayuh sida deka datai.
“Terima kasih ngagai Kepala Menteri (Datuk Patinggi Abang Johari Tun Openg) laban udah meri semangat dikena kami ngagai mayuh agi program baka tu,” ku iya.
Tandu Zaiedi, naka diatu sida udah mujur nuchuk 1,460 iku penerima vaksin di Kampung Kalong 2 enggau 2,960 iku di Kampung Paruh.
“Ungkup sida ti enda dapat bejalai ngagai palan meri vaksin, kami bisi nyendiaka sebuah tim nuju rumah ke rumah nuchuk sida.
“Naka diatu bisi 16 buah rumah udah dilawa tim kami ungkup meri vaksin ngagai sida ti enda dapat bejalai,” ku iya.-INDUN SILONG
