KUCHING: Aum veteran Soldadu Darat Malaysia (ATM) enggau ex-soldadu Sarawak nengah Reunion 180922 (RU 180922) bagi nuntut hak raban pinchin ti enda ulih diseliahka.
Chairman RU 180922 Dr Deshon Kaman Kuso madahka bisi tiga pekara besai ti deka dituntut ungkup pemaik raban pinchin soldadu.
“Keterubah, kitai deka tikas bayar pinchin ti udah bisi ditambah ngagai penyampau ti lebih engkeman,” ku iya.
Iya bejaku munyi nya lebuh ditanya pemberita pengudah Aum Veteran ATM enggau ex-soldadu Sarawak ba Tiang Pengingat, Taman Budaya ditu kemari.
Ku iya, tuntut udah nya bekaul ngagai meri ampun ngagai ex-soldadu ti kala ngaga penyalah lebuh timpuh dalam servis.
“Udah nya bekaul atur nyema orang nya ditemu salah, servis iya diketuka tekala nya.
“Lebuh servis sida diketuka, sida enda bulih ngempu skim pinchin. Nya alai, kitai nguji ngambika gelar tu diberi ngagai raban nya awakka pemaik ti diterima kami ulih diasaika sida.
“Mayuh pemaik ti diterima kami nyadi siku pinchin kelebih agi ari sukut bayar pinchin enggau bantu bukai. Kebuah pia, laban kami udah direjister enggau diaku ba baruh Opis Pekara ATM,” ku iya.
Ku iya, pekara ketiga ti deka dituntut iya nya deka nuntut pengawa meri pinchin ngagai sida ti meri servis lebih ari 10 taun.
Iya madahka, taja pan sekeda raban badu pengudah servis sepengelama 10 taun ke atas, sida enda deka bulih pinchin.
“Raban tu deka diberi duit penyampau penuh nyengkaum asil tim ari bantu sida enggau bantu ti kala diberi sepemanjai servis sebedau nya,” ku iya.
Iya nandu, pinchin ti diberi tu patut diberi nitihka pangku pengawa ti dulu enda ngira penyampau.
“Pengawa tu bejalai sepengelama lapan taun kenyau ari 2013. Tu benung digaga. Naka diatu, kitai semina ninga baikka pekara tu benung dipansik tauka diproses ungkup pemendar.
“Nya alai, seagi pekara nya bedau diputarka, kitai deka mai ngagai kort awakka hak ulih dituntut ungkup pemaik ATM ti udah pinchin,” ku iya.
Berebak enggau nya, Presiden Gerempung Sada Patriotik Rayat Malaysia Mej (B) Mior Rosli Datuk Mior Jaffaar mega minta ngambika semua raban pinchin ti bekaul negapka kaul awakka enda pambar.
“Kitai mesti beserakup ungkup ngulihka tiga tuntut hak nya. Kitai deka mantu ngatur nasip raban pinchin ti udah berambun nyawa ungkup menua,” ku iya.
