Tiga pos matau adan menua deka didiri ba Kapit

KUCHING: Tiga taba udah dikelala endur nirika Pos Matau Adan Menua, Kompleks Kuarantin enggau Imigresyen Kastam (CIQ) sereta palan Pasukan Gerakan Am (PGA).

Sapit Kepala Menteri, Tan Sri James Jemut Masing madahka tiga taba nya ba Bagi Menua Kapit ti diperambu didiri semak adan menua Indonesia.

“Raban bekuasa udah madahka diri setuju nirika CIQ ba Bagi Menua Kapit.

“Ba aum begulai enggau raban pengelikun, aku merambu nirika taba nya dikena negapka agi pengelikun ba adan menua kelebih agi pengudah Indonesia mindahka indu mengeri sida semak Sungai Mahakam dalam taun 2026,” ku iya nerang, ditu kemari.

Nambahka nya ku iya, indu mengeri Indonesia nya ila deka didiri semak Bagi Menua Kapit.

Terang iya, tiga taba nya nyengkaum Tapak Megah Satu nyadi pengkalan PGA, Taba Megah Dua nyadi Kompleks CIQ sereta Long Singut di Ulu Sungai Baleh nyadi Pos Matau Adan Menua.

Suara Sarawak