SELANGAU: Penembu tiga projek Skim Bekal Kuasa Karan Menua Pesisir (RES) ba Dun Tamin ngena agih belanja penyampau RM34.2 juta deka meri pengelantang ngagai 1,018 ruang bilik ari 60 buah rumah panjai.
Ku Adun Tamin Christopher Gira Sambang, projek tu disadang tembu bulan March 2021.
“Projek beungkus RM12.4 juta tu dipejalai ba Sekuau/Oya/Pakoh/Bekikik ke meri pemaik ngagai 16 buah rumah panjai ditangkan ba Balingian, 23 buah rumah panjai deka ngasaika pengelantang ba projek beungkus RM7.8 juta.
“Nambahka nya, 21 buah rumah panjai ba Selangau deka ngasaika pengelantang pengudah projek beungkus RM14.7 juta nya tembu ila,” terang Gira.
Gira mansutka jaku nya lebuh bejadika projek jalai ngelawa Rumah Nuyah Gerunang Pasir Terebai di baruh Program Transfomasyen Menua Pesisir (RTP) ba Batang Oya, Selangau, Hari Enam tu tadi.
Ba lansa sama, Gira mega udah bejadika pengawa nasih tanah RES ba rumah panjai nya.
