SRI AMAN: Kaban Kunsil Nengeri (ADUN) Simanggang, Datuk Francis Harden Hollis ngemataka pengawa nyuaka surat setuju nerima kunterik (Letter of Acceptance) ngagai tiga buah kompeni.
Sapit Menteri Pelajar, Inovasyen Enggau Pemansang Bakat nya madah, pengawa nya ungkup bejalaika tiga bengkah projek di baruh Opis Kereja Raya (JKR) Bagi Menua Sri Aman ba sitak DUN Simanggang.
“Entara projek ti udah dikemendar tu iya nya projek ngadu parit ba sepemanjai jalai besai Sri Aman ari 400 kilometer ngagai 600 kilometer. “Udah nya, projek nyeleti struktur jalai Titingkah Undop Bagi Menua Sri Aman enggau projek nyeliah penusah nagang tanah tusur ba simpang ke Kampung Kedang, selingkut jalai besai Bagi Menua Sri Aman,” ku iya.
Harden bejaku munyi nya rambau pengawa nyuaka surat setuju nerima kunterik ngagai tiga buah serikat ba ditu, ensana. Dulu ari nya, Harden enggau bala bukai ningaka penerang pandak bekaul projek ari Injinir JKR Bagi Menua Sri Aman, Ir Ts Minjo Simanding.
Nangkan ke lemai nya, Harden mega ngemataka pengawa nyua surat setuju terima projek Program Transformasyen Menua Pesisir (RTP) nyeleti Rumah Panjai Lina Busang di Kampung Bayai, Sungai Daun. Iya mega sempat ngabas taba projek ngemesaika jalai kaki beatap enggau palan entepan entukar di Sekula Primari (SK) Abang Aing Sri Aman iya nya sebagi ari projek RTP DUN Simanggang.
Sama bisi datai, Penulung Injinir Bagi Menua Sri Aman, Kiew Siaw Hiong, Chairman Kaunsil Pelilih Sri Aman (MDSA), Cr Balean Suji Inggol enggau bala bukai.
