Tikai anyam bebuah inovasyen

Serakup Ngasi Sarawak

KUCHING: Raban indu Serakup Ngajat Asal Iban (Ngasi) Sarawak chakah ngaul diri ba pengawa nyungkak ekonomi ruang bilik.

Ku Presiden iya, Ajat Sumoh, pengawa sida sebuat nipakka sebagi ari tuju enggau juluk Serakup Ngasi Sarawak ditumbuh kelimpah ngangkatka main asal Dayak Iban.

Ku Ajat, sida ke indu nengah Biro Indu serakup nya udah ngatur mayuh bengkah kelas enggau bengkel kenyau ari taun 2016 ti udah mayuh ngemai pemaik ngagai bala kaban.

“Ambika chunto, enti kami bisi ngatur pengerami tauka ngulu pengawa mandang, sida ke indu entara raban pemadu kiruh nyendiaka diri enggau produk ti deka dijual dikena ngulihka belanja.

“Tu nyengkaum asil pengelandik jari digaga ari manik baka tengak, tangu tauka marik empang enggau keresa penganta bukai, macham bansa kuih tradisi baka chuan, penyaram enggau sarang semut, kachang guling sereta ke bukai,” lansa iya.

NGEPUN… Sida ke indu benung kiruh ngatur bila tali kutak ti udah dibelah dikena ngayam tikai bebuah.

Sekali tu Ajat ngelansa enggau bekunsi pasal sebagi ari keranjai jari kitai bansa iya nya tikai anyam bebuah ti dikemujur nengah Bengkel Beranyam diatur Biro Indu serakup nya.

Taja pia ku Ajat, tikai dianyam nya ngena kereban baru, tali plastik tauka disebut sida ke tuai tali kutak lalu tau dikumbai kitai inovasyen tauka ubah baru ba dunya anyam tikai bebuah ba kitai bansa.

“Tikai, bidai, idas, sidan enggau seladan asal kitai Iban diayam ari bila bemban, bila buluh, wi enggau senggang nitihka bansa utai deka dianyam.

“Tang diatu dunya udah berubah ditambah enggau pemar ngulihka kereban asal ari kampung tauka babas ketegal kampung mayuh udah rusi sereta jauh kulu.

“Tibak pemintar runding, penau enggau pengelandik sida ke indu mega diatu utai dianyam tebal agi ngena tali kutak nentuka keranjai jari tu enda punas ngapa taja diduju singkang pemansang dunya laban menua jauh udah bebali,” ku Ajat.

Tambah mega ku Ajat, utai tumbuh dikena ngaga bilik dianyamka tikai baka bemban diatu mar digiga lalu enti sema bisi nanam tauka tumbuh sebelah ujung bilik enda chukup dikena ngetanka semua bansa buah tikai.

“Nya alai, dikena ngetanka buah anyam tu kitai nengah serakup tu ngambi jalai muntang, ngayam tikai ngena tali kutak aja.

“Buah mata ulat entara chura pemadu muntang dianyam kelebih agi sida ti baru belajar beranyamka tikai bebuah.

“Buah tikai bukai ti deka diangkat kitai baka bungai buan, naga berasuk, kesulai, kenyalang, pangka benak, buah akar kelait enggau ke bukai,” lansa Ajat silik lebuh dirandau Suara Sarawak.

Besai pengarap enggau pengandal kitai ngambika nembiak rebak baru ransing ati sereta angkunka pengawa belajar beranyam ba sida ke tuai ngambika keranjai jari bansa kitai tu enda punas lalu semampai ditampung dataika jemah.

BUAH TIKAI… Gaya buah tikai bisi diajar ba Bengkel Beranyam Biro Indu Serakup Ngasi Sarawak.

 

MANDING DIPEDA… Tikai ti udah tembu dianyam sereta disilup dianchau ngambika asil iya ulih dipeda semua.

 

PRESIDEN SERAKUP NGASI SARAWAK… Ajat Sumoh

Suara Sarawak