PEMANAH buah tikai ari leka lagu Redak Seribu narit perati bala penguna Facebook nyengkaum Depha Masterpiece empu.

Shana Kia anak Liong madahka diri gagit deka nengkebang buah tikai ke nyelai mimit ari tikai ke suah digaga iya ngelama tu.

“Aku teulihka runding nganyam buah tikai ari leka lagu pengudah beratika semua tikai ke udah dianyam ngelama tu.

“Semina tikai bechura ukir Iban nyadi buah tikai ke suah dianyam enggau suah dipeda kitai.

“Ari nya, aku berunding nadai salah enti aku deka nengkebang anyam tikai ke nyelai enggau bebida mimit sereta jarang dianyam orang.

“Berengkah ari nya, aku ngujika pengelandik diri nengkebang anyam ari leka lagu, aku milih lagu Redak Seribu laban lagu nya endang chukup tebilang di menua tu,” ku Shana ngepunka randau enggau Suara Sarawak.

Peranak asal Rumah Liong Ensalie, Batu 4, Jalai KJD Bintangor mega madah, pengawa nganyam tikai ari leka lagu tu pedis sereta bebida ari pengawa beranyamka tikai bukai ngelama tu.

Tang ku Shana, pemar nya enda nekul iya terus ngansah pengelandik diri nengkebang anyam tikai ari leka lagu.

“Nengkebang tikai baka tu mar amat ga diasaika aku laban sepil enda ulih dianyam laban tiap leka jaku nya enda sebaka urup.

“Pia mega, nusun urup pedis endar laban tanggung anyam belida nya enda tau salah dikira.

“Enti salah mimit tau ngujungka sepil leka jaku enda manah dipeda lalu belida enda ulih betemu ngujungka tanggung lambar deka betingkah.

“Nya kebuah, maya beranyamka tikai baka tu kitai mesti ngembuan runding ti tajam enggau liat ati,” ku Shana seraya madahka diri udah beranyam bemacham bansa tikai kenyau ari taun 2014.

Kenang penuh ba Ruai 1 pagila