KUALA LUMPUR: Kepala Menteri, Datuk Patinggi Abang Johari Tun Openg madahka berita manah deka neruska subsidi RM300 penyampau dua kali ngagai nembiak Sarawak ari IPT dikena meli tikit bilun pulai ngagai Sarawak maya musin pengerami.

“Maya sesi Town Hall Lan Berambeh Anak Sarawak taun nyin kemari kitai udah ngemendarka inisiatif nya bepun ari musin pengerami Taun Baru Cina 2019 dikena ngelempungka penanggul bala nembiak Sarawak bebelika tikit bilun dikena pulai.

“Kali tu, kitai setuju deka neruska meri subsidi RM300 penyampau dua kali nyema nembiak nyambut dua pengerami,” ku iya madah rambau pengawa bebuka puasa begulai enggau anak Sarawak ti diatur Yayasan Sarawak di Pusat Konvensyen Kuala Lumpur ba ditu.

Abang Johari madah subsidi penyampau dua kali tu diberi ketegal bisi anak Sarawak nyambut lebih ari siti pengerami.

“Kebuah pia, kitai ba Sarawak ngembuan mayuh nikah enggau bansa bukai. Engka apai iya Dayak enggau indai iya Melayu. Nya alai Gawai mega dirami sebaka enggau pengerami ke bukai.

NYADIKA KENANG… Pengari nembiak nyuaka tepa ngagai Datuk Patinggi Abang Johari Tun Openg.

“Nya alai, pekara tu ulih mantu nembiak ngerami kededua pengerami begulai enggau apai indai sereta bala diri sebilik,” ku iya madah.

Berebak ari nya, iya endang ngelalau nembiak meli tikit maya musin pengerami ngambika sida ulih pulai nyambut pengerami enggau diri sebilik.

Iya nambah, subsidi enggau bantu ke meruan ari Perintah Sarawak ngagai rayat iya tu nunjukka ekonomi nengeri nya manah, rayat ti seati, idup lantang lalu ngembuan ekonomi ke lebih manah.

“Kitai idup lantang lalu ekonomi nengeri tu manah, aku ulih terus mantu bala nembiak nengah dana tu.

“Baka ke udah disemaya dalam Lan Berambeh, aku deka meri bantu ngagai bala kitak dikena pulai nyambut pengerami,” ku iya.

Abang Johari lebuh mansutka jaku mega madah pasal inisitif perintah nengeri nyendiaka bantu khas ungkup anak mit ke baru ada di Sarawak nengah Skim Wang Turu Pemeri (EFS).

“Ukai semina nya aja, nyema bisi orang deka niri ke rumah tangga diatu, perintah deka meri RM1,000 ngagai anak mit ke baru ada dudi ari ila.

“Tu endang pekara ke deka dikunsi laban ba penemu aku nyema kitai ngereja pengawa ke manah, Allah deka mantu lalu jereki kitai deka terus betambah,” ku iya madah.

Abang Johari mega bisi madah, dikearap Yayasan Sarawak ulih nambahka pinjau enggau biasiswa ngagai nembiak dalam mayuh bengkah disiplin tu beguna amat ngambi neruska langgur pemansang nengeri.

Kelimpah begulai makai paskah, Abang Johari mega sembiang maghrib, isya enggau sembiang tarawih begulai enggau anak Sarawak ke bisi ngulu pengawa nya.

Pengudah tembu pengawa nya, Abang Johari enggau bini iya Datin Patinggi Juma’ani Tuanku Bujang nyuaka duit raya ngagai bala nembiak IPT ke bisi datai.

Suara Sarawak