KUCHING: Ex-Sapit Menteri Pemansang Menua Pesisir enggau Kandang Menua Datuk Dr Tiki Lafe terus terang madah iya tepaut ati enggau PSB.

Kenu ku iya, semua objektif parti nyema iya sebuah parti ke amat, patut gawa ke rayat ukai ungkup diri empu lalu ari perati nya, PSB ngembuan semua ulah pendiau nya.

Nya alai, Dr Tiki ti mega kaban PPBM ngaku tepaut ati enggau PSB lalu datai nyukung pengerami ke diatur parti nya malam ensana.

“Ba penemu aku, nadai penanggul kitai ari parti bukai ngulu pengerami ke diatur sesebengkah parti lebih agi baka Pengerami Mantar Gawai PSB tu,” ku iya maya dirandau pemberita rambau Pengerami Mantar Gawai diatur PSB ditu malam ensana.

Dr Tiki ke mega ex-Kaban Parlimen Parlimen Mas Gading dipeda duduk segulai enggau raban ketuai tinggi PSB ba pengerami nya.

Datuk Dr Tiki Lafe

Ngelansa pekara ke sama sekalika bisi ati deka nyereta PSB, Tiki madah iya deka mantaika penerang rasmi ngagai media bekaul enggau pemutus iya.

“Tuju aku dka mantu ngenegapka agi politik di Sarawak enggau Malaysia nengah sebarang aja jalai ke ulih aku bantu.

“Aku datai kitu laban deka meri sukung ngagai bala bakih dalam PSB,Ku iya serata madah PPBM endang mantu pangan diri.

Sebedau tu, Dr Tiki entara siku ari 19,000 peranak Sarawak ke udah ngerejista diri masuk PPBM kena 31 Ogos 2018.

Pekara nya dibantaika pengari Protem Bersatu Sarawak Affendi Jeman nengah aum media pengudah Tiki ngisi pom nyadi kaban masuk PPBM.

Affendi madah, Dr Tiki endang ex-pengari ayat ke nunjukka pengerindu lalu ngisi pom masuk Bersatu, iya mega andal mayuh agi ex-pengari rayat deka nitihka Dr Tiki.

Dr Tiki sebedau tu, endang kaban SPDP diatu dikangau PDP pansu ari parti nya lalu nyadi chalun ngatika diri ba Pengawa Bepilih Besai Ke-13 (PRU13).

Tang, iya alah ba PRU13 ngagai chalun Barisan Nasional Datuk Anthony Nogeh ti menang enggau majoriti 2,156 undi.

Suara Sarawak