KUCHING: Pengawa nyual tikit bas ekspres ari Kuching ngagai sekeda pelilih ba Sarawak abis dijual beserimbai enggau Hari Raya Aidilfitri ti enda lama agi.
Pengawa matau dipejalaika Suara Sarawak ba terminal bas ekspres Kuching Sentral ditu tetemu ke tikit bas ekspres ngagai Pelilih Miri dulu agi abis dijual dibanding pelilih bukai.
Gaya ba terminal bas nya chukup richah laban mensia mayuh berengkah mulai kediri ngagai menua diri empu.
Operator nyual tikit Bas Asia, Marina Kadir, 63, madah, bala penguna udah meli tikit tumu berengkah ari 1 April nyentuk diatu.
“Taja pia, tikit bas ngagai Miri berengkah ari 18 nyentuk 20 April tu udah penuh.
“Kebuah pia kaban bala penguna kami ukai semina orang Muslim aja tang orang ti ukai Muslim mega bela ngemulai kediri ngagai menua diri empu seraya kemisi,” ku iya.
Iya mega madah, pengawa nambah penyampau bas ti beoperasyen nya semina ungkup pejalai ke Sibu aja.
Marina ngelalau mensia mayuh ti bedau meli tikit bas dikena pulai beraya diperansang lengkas meli tikit bas.
