Tilapia Batang Ai chukup nyamai

SIMANGGANG: Perintah Sarawak nambahka asil ikan lalu Bagi Menua Sri Aman (Batang Ai) nyadi pemansut eksport besai ikan tilapia pengudah Singapore ngaku isi ikan dia nyamai agi ari endur bukai.

Kepala Menteri Datuk Patinggi Abang Johari Tun Openg madah, bulan nyin tadi Sarawak sepenyampau 12 tan tilapia ari Batang Ai dieksport ke Singapore.

Ku iya, pengimport ari Singapore ngaku isi tilapia ari Sarawak manis agi dibanding enggau Semenanjung sereta nyamai.

“Kemari, sida (pengimport) minta baru tilapia nya.

“Kitai bisi Batang Ai endur nupi lalu Sarawak bisi juluk nambahka agi asil ikan nyengkaum empurau,” ku iya.
Iya mansutka jaku nya lebuh bejadika Pengerami Benak ba tebing Batang Lupar ditu tadi.