Tilapia Batang Ai di Sugarbun

KUCHING: Perintah Sarawak seruran nyukung tegut sereta mantu pengawa pemain industri betanam betupi ba menua tu nyengkaum pengawa akuakultur.

Nya alai, sebuah restoran pemakai Sarawak, Sugarbun udah nyain siti sempekat Bekal Eksklusif Ikan Tilapia enggau Borneo Eco Fish Sdn Bhd, ditu kemari.

Sapit Kepala Menteri Datuk Amar Douglas Uggah Embas madahka sempekat entara dua piak nya deka terus nambahka industri ikan tilapia Batang Ai sereta nyungkak sektor betanam betupi nengeri tu.

“Kitai udah mujur eksport ikan tilapia ke Singapore lalu diatu kitai udah ngerikod siti pemujur ke alai kitai meri bekal ikan tilapia ngagai Sugarbun,” ku iya.

Uggah madah munyi nya lebuh bejaku ba pengawa nyain Sempekat Bekal Eksklusif Ikan Tilapia entara Borneo Eco Fish Sdn Bhd enggau Sugarbun di Wisma Sugarbun ditu kemari.

Nangkan nya ku iya, Kepala Menteri Datuk Patinggi Abang Johari Tun Openg udah nagit sektor betanam betupi nyadi jalai Sarawak nyadi pengeksport pemakai beresi manggai taun 2030.

“Diatu kitai nyadi pengimport pemakai enggau asil beresi RM4 bilion setaun.

“Tang aku andal enggau chara baru ari Perintah Sarawak, kitai ba jalai ke betul lalu taja pejalai tu lama tang pekara nya ulih dijapai,” ku iya.

Suara Sarawak