Tilapia Sarawak nyamai diempa

KUCHING: Sarawak ulih nyadi pengeluar produk ikan tilapia ba kapasiti ti besai laban ikan ti ditupi ditu nadai bau lang enggau dijamin bekualiti.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka ikan tilapia ti ditupi ba Sarawak nyelai ari ikan tilapia ti ditupi ba Semenanjung laban isi ikan nya enda bau lang sereta nyamai diempa.

“Apin lama, direktor kompeni ari Singapura ti ngimport ikan tilapia Sarawak bisi datai kitu lalu betemu enggau Kepala Menteri Datuk Patinggi Abang Johari Tun Openg.

“Ba penemuai nya, dia iya madahka ikan tilapia ari Sarawak bebida asai ari tilapia di Semenanjung laban nadai bau lang, isi nyamai sereta pendiau ikan bekualiti,” ku iya.

Uggah bejaku munyi nya lebuh ditanya pemberita maya ngabang ngagai rumah Eksekutif Editor New Sarawak Tribune Rajah Murugiah ditu, kemari.

NYAMAI DIEMPA…Tilapia Sarawak.

Ku iya, iya bisi amai pengandal endur Sarawak nyadi pemekal ikan tilapia sereta nerima peminta tinggi ikan nya ari Singapura.

“Lebuh nemuai ngagai Batang Ai meda chara orang proses ikan tilapia din, aku andal peminta ba produk ikan mata tu deka tinggi ari Singapura.

“Enggau nya, kitai semina patut ngadu sereta nambahka perengkaguna din endur sida nitihka standard pengeluar pemakai sereta kualiti ikan ti dipinta menua nya,” ku iya.

Tandu iya, pekara tu manah alai Sarawak sama ulih besemekih enggau menua bukai laban diatu Sarawak bisi ngembuan tiga buah Dam di Murun, Bakun enggau Batang Ai ti manah endur nupi ikan.

“Enti peminta majak mayuh dam di Batang Ai empu agi ulih dikemesaika.

“Semina kitai patut ngadu perengkaguna ti berstruktur ngambika chara proses ikan tilapia din tetap sebaka serta ulih ngetanka kualiti ikan nya,” ku iya.

Kena 3 Oktober tu tadi, Sarawak keterubah mengeksport sebuah kontena ikan tilapia mata sepemerat 12 tan ngagai sebuah supermarket di Singapura.