ENGKILILI: Tim Miasim FC mujur menggi gelar champion Pekit Futsal Aktif @ Menua Pesisir 2023 Renggat Nengeri Sarawak.
Berebak enggau nya, Tim Miasim FC mujur ngalahka Tim Pelavosta X enggau Acuedos Mania & RC 7 ba penuduk kedua enggau ketiga.
Bisi 20 tim besatup ba pekit futsal ti diatur Opis Menteri Nembiak enggau Lumba (KBS) Sri Aman nengah kerejasama Kelab Mail Bol Englant FC.
Pekit nya diatur ba Gelanggang Futsal Skrim Skrang kena 18 November tu tadi lalu ADUN Engkilili, Dr Johnical Rayong Ngipa diberi basa bejadi pekit nya.
Sama datai, pengari KBS Sri Aman, Faizal sereta pengari Kelab Main Bol Englant FC, Clinton enggau Remali.
Rambau bejadi pekit nya, Dr Rayong bela meri bantu mata duit RM5,000 ngagai kelab nya dikena bejalaika program enggau aktiviti sida.
Iya ngarap program nembiak baka nya ulih ditampung dudi hari kelebih agi ba sitak Skrang, Engkilili enggau Lubok Antu.
“Bemacham program bekaul nembiak patut diatur dikena nempa nembiak aktif enggau ngempung sida nengah lumba,” ku iya.
