Tim Sareyongnus 607 champion main takraw

SARATOK: Tim Sareyongnus 607 mujur ngempu trofi champion Pekit Main Takraw diatur ba Gelanggang Takraw Gerempung Lumba Enggau Main Awik, ditu, apin lama ke udah.

Sida mujur ngalahka tim Awik B lalu ngujungka sida nerima perais RM150.00,ptrofi enggau midul.

Chairman Pengatur Pekit Main Takraw 2019 Howard Bunsu Resik madah pekit baka tu endang besai tuju sereta reti ngagai sida lebih agi diatur beserimbai enggau Hari Kebangsaan.

Ku iya, tuju pengerami dikena nerenak pemanah kaul entara pupu bansa kelimpah dikena nunjuk sukung nadai belampung ngagai tiap pengerami ke tau meri pemaik ngagai rayat menua pesisir.

“Program serak tu ukai semina endur berebutka perais tang dikena kami nanggal kaul bala nembiak kelimpah nyidi sida ke bisi pengelandik bemain takraw,” ku iya.

Iya madah munyi nya rambau bejadi sereta nangguh pekit nya kilah ensana.

Nitiku Howard ke mega Chairman Gerempung Lumba Enggau Main Awik bisi 16 iti tim nyereta pekit sekali tu nyengkaum siti tim ‘dikangau khas’ ari Sarikei.

Pekit tu tadi semina dibuka ngagai raban nembiak ke beumur 25 taun ke baruh.

“Kebuah pia, aban maya umur tu sida agi ulih diansah,sereta bisi agi peluang ngemujur diri nyema sida bisi pengelandik,”tandu Howard.

“Ngarap udah pekit tu ila, deka mayuh agi penyereta ari menua besemak nyereta pekit,” ku iya.

CHAMPION… Tim Sareyongnus 607 nerima perais ari komiti pengatur pengudah dipadu ngempu gelar champion main takraw ditu, apin lama ke udah.

 

ILA NGUJI BARU…Tim Awik B ti bulih lumur dua besemaya deka ngerebut gelar champion ba pekit main takraw ti deka datai.