KUCHING: Sarawak enggai nginsur haribulan Petroliam Nasional Berhad (Petronas) patut mayar chukai jual produk Petroleum lima peratus.

Menteri Utiliti Datuk Seri Dr Stephen Rundi Utom madah, Perintah Sarawak enda belembut pasal pekara nya laban tu endang atur undang-undang.

“Kami enda nginsur haribulan baka dipadah Kepala Menteri Datuk Patinggi Abang Johari Tun Openg enda belembut laban chukai dibantai tu bepelasarka atur undang-undang,” ku Rundi.

Iya mansutka jaku nya ba aum pemberita pengudah Pengawa Ngelanchar Minggu Tenaga Entarabansa (IEW) 2020 ditu tadi.

Ku Rundi, Sarawak bisi hak nagih baru laban bisi sempekat entara kededua piak lalu nadai ulih ngubah undang-undang ti udah ditetap,” ku iya nerang.

Rundi madahka pemain industri minnyak bukai baka Shell, Murphy Oil enggau Nippon Oil udah mayar chukai jual sida.

“Nama kebuah Petronas enggau mayar lalu enda nitihka atur undang-undang?

“Sarawak begunaka bayar chukai tu dikena ngemansangka menua laban kitai jauh tinggal dibanding nengeri bukai ba Semenanjung Malaysia,” ku Rundi nerang silik.