Tinggal sepuluh pemekit ngerebut gelar Kumang Online 2021

SARATOK: Sepuluh iku dara bajik mujur masuk renggat kepenudi Pekit Kumang Gawai Online 2021 Trofi YB Datuk Ali Biju.

Tuai Koordinator Pekit, Seman Endoi madahka sida tubuh sepuluh nya udah nerima undi pemadu mayuh ari 50 pemekit ba renggat kedua.

Ku iya, chara ngundi pemekit serak tu bebida enggau renggat keterubah suba ti diundi mensia mayuh nengah likes gambar pemekit ba laman Facebook rasmi Ali Biju empu.

“Renggat kedua tu, bala pemekit mantaika diri nengah video bejalai tauka Catwalk bepanggai ba kreativiti tauka pengelandik diri empu.

“Ketegal bisi penanggul, dia bala komiti ngaga pemutus lalu setujuka mensia mayuh ngundi dara dikerindu nengah google form ngambi pengawa lurus agi,” terang iya lebuh dirandau Suara Sarawak.

Seman madah, sepuluh pemekit dipilih masuk renggat kepenudi nya Serena Anak Tony enggau 10,816 undi, Emily Elizabeth Beard (4,289), Josephine Jelawat Anak James Jimmy (2,722) enggau Jessica Awing Ureng (2,520).

Ditangkanka Evallynn Priscilla Mau Anak Thomas Inau enggau 2,179 undi, Vannessa Lee (1,948), Forleenarica Juana Anak Juan (1,882), Christilyn Anak Edwin Brundang (1,824), Claudia Seti Anak Lim Sagoh (1,808) sereta Elyana Anak Ricky (1,769).

Enti nadai nanggul ku iya, bala komiti deka mantaika Video Kreatif Sepuluh Pemekit Kumang ba laman Facebook rasmi Ali Biju empu urung pukul 7 lemai, 24 June 2021.

“Undi dibuka baru ke alai mensia mayuh ulih ngundi ngena Google Form baka ba renggat kedua tu tadi lalu sida tau ngundi nyentuk pukul 11.59 malam, 26 June 2021.

“Pemutus sapa bagi menggi gelar Kumang Gawai Online 2021 Trofi YB Datuk Ali Biju deka dibantai nengah FB Live ba laman Facebook rasmi Ali Biju empu kena 27 June 2021, pukul 7.00 lemai,” ku Seman.

Berita penuh Ruai 1 pagila.

Suara Sarawak