Tiong Sii terus chakah mantu rayat

SARIKEI: Meri servis ti manah kelimpah ari neruska agenda pemansang ngagai rayat nyadi sebagi ari misyen Kaban Kunsil Nengeri (Adun) N.45 Repok, Datuk Seri Huang Tiong Sii.

Ku iya, entara fokus nya nyengkaum perengka guna ti cukup ngambika ulih nampung guna mensia mayuh sereta nambahka perengka guna dalam pengawa belajar.

Sepemanjai tiga taun nyadi pengari rayat ku iya, mayuh pengawa udah dipejalaika iya nyengkaum nambahka infrastruktur enggau perengka guna pemun ke rayat baka sekula, gerija enggau rumah oanjai enda ngira ba mengeri tauka menua pesisir.

“Aku mega beratka pengawa belajar laban nya siti jalai pemadu manah pansut ari penyeranta. Beduduk ari nya, aku mayuh nguji ngemanahka infrastruktur ba sekula di Dun N.45 Repok.

“Ukai nya aja, aku mega nyendiaka mayuh bengkah bantu baka gari sekula, kasut enggau beg sekula ngambika bala nembiak enda tinggal ba pengawa besekula.

KENANG BEGULAI…Tiong Sii (tengah) begulai enggau mensia mayuh lalu nunjukka GPS dalam program Ketuai Begulai enggau Rayat di Sungai Merudu Sarikei.

“Aku pechaya penemu enggau pengelandik ulih nambahka ekonomi kelimpah ari meri penguntung ngagai tiap bengkah komuniti,” ku iya rambau pengawa Ketuai Begulai enggau Rayat di sebuah restauran ditu, kemari.

Tiong Sii madah, mayuh program udah dipejalaika ngambika ulih meri penguntung ke rayat sepemanjai iya nyadi pengari rayat.

Berebak enggau nya ku iya, iya nega rindu ninga diri empu penanggul ti ditapi rayat nengah pengawa mbetemu enggau rayat ti digulu iya.

“Aku deka terus chakah mantu rayat dalam tiap pekara ti dipansutka sida kelebih agi ke guna semua.

“Nya alai, aku ngarapka sida ti begunaka bantu infrastruktur baka jalai alun enggau ke bukai ngambika mandangka pinta sida enggau naka pengelengkas.

Berebak enggau nya, iya meri tabi basa ngagai Kepala Menteri Datuk Patinggi Abang Johari Tun Openg ti bejalaika projek ti meri bekau pemadu besai ngagai rayat menua nya.

“Entara iya projek ngaga jalai Sungai Pasi ke Sibu, pengawa ngaga jalai ke Tanjung Manis sereta ke bukai. Tu nunjukka iya amat beratka guna rayat Sarikei. Terima kasih Abang Jo.

“Berebak enggau aku ngelalau semua rayat ngambika terus meri sukung ngagai Perintah Sarawak ba baru pegai Gempung Parti Sarawak (GPS) ngambika agenda pemansang ke diperambu ulih ditampung,” ku iya.

Nangkan nya, iya mega ngaga pengawa betemu enggau rayat ba rumah Lau Chik Ping, Sungai Merudu.

Dua bengkah program nya nerima ti chukup rami ari mensia mayuh ba genturung nya. Sama bisi datai Kaban Parti Sa’ati Rayat Sarawak (SUPP) enggau ketuai raban bansa.

Suara Sarawak