ENGKA bisi sekeda kitai apin nemu pasal kaul menua bukit Bung Bratak di Pelilih Bau enggau raban bansa Dayak Bidayuh Jagoi dia.
Kebendar, Bung Bratak kala endur aki ini raban bansa Jagoi diau kelia ti datai ari Bukit Sungkong, Kalimantan Indonesia.
Beratus taun pengelama sida diau lantang, likun sereta kaya ari asil bumai betaun kelimpah pesaka asal Jagoi nya empu. Taja pia, penusah besai nuntung kena 1 Mei 1838 udah ngubah semua nya.
Kenu ku jerita, kena 1 Mei 1838, genturung pendiau Bung Bratak udah diserang seraban orang Iban ari Skrang diketuaika Bagat enggau 70 iku bala iya.
Bagat enggau sida sebala udah nunu rumah panjai ke bisi ba genturung pendiau nya ke alai tujuh baruk (rumah asal Bidayuh) enggau tujuh basal (tibang nyimpan padi) mega angus lengis.
Sida ke nyerang menua nya udah ngerampas semua bekal padi peranak Bung Bratak lalu ngerumpak semua keresa lama baka tawak enggau ke bukai diempu peranak dia.
Bala sida Bagat mega munuh barang sapa ke ngelaban sida ke alai nyau deka 2,000 iku peranak Bung Bratak bebadi nyawa ba penusah nya lalu mayuh sida ke indu enggau nembiak mit ditaban lalu nyadi ulun.
Pengudah sida tepantup ati ngerinsa ba menua Bung Bratak, Bagat enggau sida sebala lalu belayar pulai nepan 14 bot ti sarat ngundan padi enggau ulun, mulaika diri ke Skrang.
Lebuh sida datai ba Skrang, Ketuai Lanang iya nya ketuai raban bansa Iban di Skrang berasai asa amat meda ulah Bagat baka nya, ulah ti enda dikenggai iya.
Ketuai Lanang lalu ngasuh Bagat ngelepaska semua indu enggau nembiak mit ke ditabanka iya.
Ketuai Lanang mega penuh tanggungpengawa ngasuh peranak genturung pendiau ba Skrang ngambu sida nya ke anak lalu idup begulai enggau raban bansa Iban Skrang.
Kebendar, ulah Bagat enggau sida sebala semina deka ngulihka jalai muntang mutarka penanggul suntuk bekal berau ba menua sida lalu pengawa ngerumpak peranak Bung Bratak enda ulih diterima Ketuai Lanang.
Nikalka kenang lebuh Bung Bratak diserang, Panglima Kulow, siku ari panglima tebilang ba Bung Bratak nadai dia laban turun kumai, enda jauh ari nya.
Sida semina sedarka bisi penusah nyadi pengudah tepedaka sebun datai ari genturung pendiau nya lalu berumban mulaika diri tang udah kelalu laun laban Bagat enggau bala iya udah meleka ari endur nya.
Panglima Kulow empu tetemuka bangkai bini iya ke dibunuh ba jelatung, enda jauh ari rumah sida, lalu iya mai sida ke agi idup nya baum.
Penemu semua digempung, Panglima Kulow enggau sekeda bala bukai ke dipilih deka minta bantu ari luar, sama nyidi bala semenua ke ditaban sida Bagat.
Pejalai minta bantu ke Pontianak di Barat Kalimantan, Sambas enggau Brunei puntan laban nadai siku deka mantu sida. Pengudah nyau deka putus pengarap, berita manah diterima ari Rajah James Brooke.
Rajah James Brooke setuju mantu Panglima Kulow nyelamatka bala iya ti ditaban lalau bepadan ngelaban Bagat enggau Iban Skrang.
Nya alai, dalam taun 1841, Panglima Kulow mupuk enggau raban perang di baruh Rajah James Brooke nuju Skrang. Enda berasai sida lalu datai ba menua Iban Skrang di baruh pegai Lanang.
Taja pia, utai ke ngasuh sida Panglima Kulow alit ati, penatai sida disambut Ketuai Lanang enggau penuh basa.
Maya tu mega Ketuai Lanang lalu minta ampun ngagai Panglima Kulow enggau sida sebala ketegal pengilap Bagat enggau bala iya lalu sida setuju nyerahka baru semua bala ke ditaban suba pulai ke Bung Bratak.
Taja pia, semua sida ke ditaban nya enggai mulaika diri ke Bung Bratak laban udah jadi enggau nyemilik peranak Iban ba Skrang.
Nya alai Panglima Kulow enggau bala iya pulai ke Bung Bratak lalu penatai sida disambut naka pengerami.
Berindik ari nya, peranak Bung Bratak bisi kaul rat enggau Iban Batang Skrang lalu kaul sida tu majak teguh pengudah betampil enggau pangan diri.
Pengudah menua Sarawak likun, asil pengawa dipejalaika Rajah James Brooke, majak mayuh peranak Bung Bratak pindah ke kandang menua besemak lalu berimbaka tanah endur bumai, bekebun sereta ngiga kereja bukai.
Bepelasarka pansik, urung 40 genturung pendiau nyengkaum tujuh ba Pelilih Seluas, Kalimantan Barat, Indonesia bisi kaul sedarah enggau peranak asal Bung Bratak.
Raban kepenudi misah ari genturung pendiau nya iya nya ari raban bansa Tembawang ti ninggalka Bung Bratak dalam pun taun 1970-an lalu diatu diau mendam ba Kampung Tembawang Sauh, beserimbai pendiau enggau Kampung Stenggang, Bau.
Kemaya hari, tipan jerita Bung Bratak diangkat nyadi siti ari pesaka asal raban bansa Jagoi lalu nyadi sejarah, ditu mih didirika batu pengingat, dikena ngingatka penusah besai nya.
Bung Bratak diatu nyadi taba sejarah dalam taun 1988 ari Gerempung Bansa Dayak Bidayuh (DBNA) digelar Palan Pesaka Asal Bung Bratak (BBHC).
Kenyau ari nya, 1 Mei ninting taun, raban bansa Bidayuh Jagoi ari kandang ngelingi Kuching, Bau enggau Lundu deka begelumu ba Bung Bratak dikena ngingatka penusah besai ke kala nyadi dia, aki ini sida ke bebadi nyawa.
Hari Bung Bratak diatu dirami ukai semina dikena ngingatka aki ini bansa Jagoi aja tang mega siti ari pematak dagang temuai sereta endur belepa kelebih agi ba Pelilih Bau.
Bemacham atur pengerami bukai diatur nyerumba Hari Bung Bratak baka main asal nyengkaum Pekit Dayung Sangon ke diatu ba tuchung bukit tu.
Tu mih sekeda tipan jerita Bung Bratak enggau pejalai Panglima Kulow ke Skrang berindik ari penusah besai ke nuntung 1 Mei 1838 ari pengilap Bagat enggau bala iya.
Kitai ngarapka taba sejarah Bung Bratak tu deka seruran dijaga enggau diintu meruan dikena ngetanka pesaka asal raban bansa Bidayuh Sarawak dataika jemah.
