Titih chara pelajar tumu di Jipun

SERIAN: Pelajar renggat tumu patut dikemerat ungkup nembiak sekula primari laban nya tikas ke pemadu besai reti nentuka pemujur sida.

Menteri Pelajar, Sains enggau Pansik Teknologi Datuk Seri Michael Manyin Jawong berkata, menua tu patut beteladanka menua Jipun ti chukup ngemeratka pelajar tumu anak mit.

Ku iya, maya nemuai ke Jipun suba, iya meda sekula primari enggau sekondari disikap enggau perengka guna sereta kereban belajar nyengkaum pengajar ti bekualiti.

“Jipun sama baka menua maju ke bukai ngemeratka pelajar tumu anak mit,” ku iya rambau Pengerami Ngelanjarka Transformasyen Sekula-Sekula Sitak Dun Tebedu di Dewan Tayung Langui Kampung Pichin, Serian kena Hari Minggu tu tadi.

Ku Manyin, pekara tu laban sida nyendiaka pelajar dikena napi pelajar Sains, Teknologi, Injinir enggau Matematik (Stem).

Tandu iya, semina 30 peratus nembiak ba menua tu bisi ngambi bidang Stem ari 60 peratus ke diselinting.

Datuk Seri Micheal Manyin Jawong

Iya madah, nembiak nyau lebih fokus ngagai bidang litericha dibanding enggau bidang sains.

“Pengajar patut nanam pengerindu nembiak ngagai bidang Stem lebih agi ba mata pelajar Sains enggau Matematik.

“Nembiak ke landik ba mata pelajar Sains enggau Matematik deka ngemuntangka sida tama universiti lalu nyadi graduan ke nyulut,” ku iya.

Manyin mega madah, Sarawak deka nguna jaku English ba mata pelajar Sains enggau Matematik ba taun baru nyema nadai bantah ari apai indai.

Ku iya bisi RM19 bilion agih belanja udah diungkup dikena matih pengajar ngajar Sains enggau Matematik dalam jaku English lalu apai indai mayuh nyukung pengawa nya.

“pengawa nguna jaku English ba Sains enggau Matematik ulih negapka pengelandik ngena jaku English ba bala nembiak.

“Jaku English tu jaku entarabansa ungkup pengawa dagang, diplomasi enggau teknologi,” ku iya.