DEBAK: Peranak diau ba menua mudah ampuh dilalau seruran bejaga enggau nitihka jaku gerah raban bekuasa enti diasuh mindah ke Palan Ngenduh (PPS).
Sapit Premier Sarawak ti mega Chairman Komiti Penyangga Penusah Nengeri (JPBN) Sarawak, Datuk Amar Douglas Uggah Embas madah, pengelikun peranak dikemeratka perintah nengeri enti penusah bah nyadi.
“Sida ti engka diau ba menua suah ampuh bah dipinta sedia lalu enti diasuh mindah, sida mesti pindah.
“Kitai minta sida mindah ngambi likun. Enti sida terus diau ba rumah nya maya bah lalu tikas ai niki, nya tau ngeruga pengelikun sida.
“Pengelikun sida ti tasah bah tu diberita kami perati kebendar,” ku iya ngagai pemberita pengudah ngabas PPS Dewan Millenia ditu, tadi.
Sama datai Residen Bagi Menua Betong Richard Michael Abunawas enggau Pegawai Pelilih Betong Alfred Geling Ason.
Uggah madah baru, PPS Dewan Millenia udah dibuka pukul 9 malam kena Hari Tiga ketegal penusah bah ti nuntung tiga buah genturung pendiau.
Ku iya, PPS nya udah endur 51 ruang bilik ngaul 213 ti tasah bah ari Kampung Lalang, Kampung Babu enggau Kampung Bungey diau ngenduh.
