Titih perambu ke udah dilanggur perintah

KUCHING: Raban nembiak mesti mereti sereta nitihka pemansang tegap ti udah diperambu perintah ungkup Sarawak.
Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka raban nembiak megai tanggungpengawa besai dalam nyaga hak Sarawak jemah ila.
“Kepala Menteri (Datuk Patinggi Abang Johari Tun Openg) diatu udah merambu Sarawak enggau pengabis manah, nya alai raban nembiak patut mereti sereta nitihka perambu nya enggau manah.
“Enti enda, nya tau disemaka baka apai indai ti ngembuan reta rumah besai enggau mayuh duit tang enti anak nadai mereti ke ajar semua nya deka lenyau,” ku iya.
Kui Hian bejaku munyi nya ngagai pemberita lebuh ditanya pasal lalau iya sentang tanggungpengawa raban nembiak napi Pengawa Bepilih Besai Nengeri (PRN) ti deka datai ba Balai Penyerakup Mensia Mayuh di Batu Kawa ditu, kemari.
Tandu iya, diatu sida patut pechaya ke perambu Kepala Menteri dalam nyeridi raban nembiak awakka ulih ngemansutka ketuai ti ulih megai Sarawak jemah.
“Sarawak ngembuan mua ti tampak lalu ba taun 2025, Sarawak deka nyadi nengeri pemadu kaya enggau kering.
“Kami deka semua orang kena rampit penguntung, gaga ngasaika pemansang sereta nyambung pemansang tu jemah.
“Kitai enggai baka menua Amerika Syarikat ti nadai beserakup, belayaka pengarap enggau rayat midang nadai kebuah,” ku iya.
Nya alai, iya madahka sida deka nyeridi nembiak rebak baru ngambika terus ngembuan runding ke sama iya nya terus ngetanka penyerakup di Sarawak.

Suara Sarawak