Titih Sistem Gintir ba atur niki pangkat

KUCHING: Kongres Serakup Orang Gawa Perintah (CUEPACS) minta Perintah Nengeri Sarawak nguna Sistem Gintir serak ti kedua ba atur pengawa nikika pangkat orang gawa perintah.

Presiden CUEPACS Datuk Azih Muda madah negeri bukai di Semenanjung Malaysia udah nguna sistem nya alai semina Sarawak aja ke bedau.

“CUEPACS minta Perintah Negeri ti betuaika Kepala Menteri Datuk Patinggi Abang Johari Tun Openg nguna Sistem Gintir serak ti kedua,”ku iya.

Azih mansutka jaku nya ba aum pengarang berita pengudah bejadi Aum Deligit Tiga Taun Sekali 2016-2019 CUEPACS Sarawak di Kuching kemari.

Sistem Ginitir nyadi sebengkah chara dikena mansik baru atur nikika pangkat raban pengereja pengawa perintah bepelasarka timpuh servis.

AUM PEMBERITA…Azih (duduk tiga kiba) bejaku ngagai pemberita di Kuching. Bela dipeda Ahmad(duduk tiga kanan).

Nengah sistem tu, atur nikika pangkat servis orang gawa perintah ke dipansik bepelasarka timpuh 13 taun diganti ngagai 10 taun ungkup ti keterubah lalu lapan taun ungkup serak ti kedua.

Kelimpah ari nya, Azih pechaya sistem nya deka meri awak ngagai orang gawa perintah Sarawak ngasaika pengelantang ba pengidup..
Ku iya nambah, sistem nya mega enda meri empas ke besai ba atur belanja Negeri Sarawak.

“CUEPACS pechaya ekonomi Sarawak deka ngerembai alai kuasa meli rayat deka majak nambah.

“Engka ikas pengelantang pengidup raban orang gawa perintah deka majak niki,”ku Azih.

Sistem Gintir mungkur raban Gred 11 nyentuk ngagai 29, ti ulih ngasaika gaji sida ditikika enggau lengkas agi.

CUEPACS Sarawak kemari ngadu aum deligit ba opis baru iya nya ba begunan ke diberi Perintah Negeri Sarawak.

Begunan tauka rumah ba Jalai Bamfylde nya dikemanah nengah belanja RM180,000 alai CUEPACS Sarawak nyadi pampang keterubah ngembuan opis ke diri empu di Malaysia.

Ba pengawa nya mega Presiden CUEPACS Sarawak Ahmad Malie madah diak pampang Sarawak bisi nerima geran penyampau RM100,000 ari Perintah Sarawak.