Tong gas LPG deka nitih chura Petros

KUCHING: Tong gas Petronas ke diidar di Sarawak deka ditukar chura ari gadung ngagai mirah, burak enggau chelum nitihka chura Petroleum Sarawak Berhad (Petros).

Kelimpah ari nya, bansa enggau kelai Petronas ba tong gas ai petroleum (LPG) nya mega deka diganti enggau Petros.

Kepala Menteri Datuk Patinggi Abang Johari Tun Openg madahka ubah gamal tong gas kena berapi nya berindik ari agih gas domestik ngagai Petros ari Petronas.

Pekara nya lalu nyadika kompeni minyak Sarawak nya nyadi siti entiti ngagai pengawa meri bekal, nyual sereta ngagihka gas domestik ngagai rumah, dagang enggau industri Sarawak.

“Udah tu nadai agi tong gas kena berapi chura gadung tang mirah, burak enggau chelum laban nya chura enggau kelai Petros,” ku iya.

Iya madah munyi nya lebuh bejadika Program ‘Sarawak Kita Empun’ di Indu Opis Parti Pesaka Bumiputera Bersatu (PBB) Jalai Bako ditu, kemari.

Taja pia, Abang Johari nyemetak madah rega gas kena berapi nya agi mengkang nitihka makit ke diatu.

“Kitai nukar chura dulu, enti kitai menang besai ba pengawa Bepilih Nengeri tu ila, baru kitai ngatur baru rega tong tu,” ku iya.

Berengkah 1 Januari 2020, Petros ngembuan kuasa penuh ngagai pengawa meri bekal, nyual sereta ngagihka gas asli di Sarawak seriris enggau Ordinan Pengagihan Gas Negara 2016.

Berebak enggau nya, Abang Johari madahka kelimpah ari ngagihka gas domestik ari Petronas, Perintah Sarawak deka ngambi 15 peratus guna ekuiti LNG Tiga Sdn Berhad (MLNG Tiga) ari anak kompeni Royal Dutch Shell plc, Shell Gas Holdings (M) Ltd.

Tu lalu nyadika penyampau guna pegai Sarawak dalam operator loji gas ai tulen (LNG) penyampau 25 peratus.

“Taun 2019, kitai udah bulih dividen penyampau RM2 bilion ari LNG tu,” ku iya.

Nya alai iya madahka deka seruran ngetanka hak enggau kuasa Sarawak ba produk minyak enggau gas.

Suara Sarawak