SIBU: Palan Servis Kaban parlimen Sibu deka ngatur pengawa nyual gas subsidi beserimbai Pengerami Gawai Dayak ti bepalan ba Penyangkai Feri Opis Kereja Raya (JKR) Sungai Bidut (sepiak Klinik Komuniti) kena 27 Mei pukul 7.30 nyentuk 11 pagi.
Kaban Parlimen Sibu, Oscar Ling Chai Yew madah, penyampau penuh subsidi tong gas nya bisi 500 tong.
Ku iya, konsep nyual tong gas subsidi nya, ‘sapa dulu, iya bulih’ nyentuk tong gas nya abis dijual.
“Nya alai, sida ti beminat meli tong gas subsidi diperansang datai tumu laban enti laun sida enda ampit.
“Bala pemeli dilalau patut mai tong gas puang ngambi ulih disilih ngena tong gas baru ti penuh.
“Rega tong gas kuning iya nya RM20 setong pengudah diberi subsidi tang enti rega asal RM32 stong,” ku iya tadi.
Ling madah, pengawa meri subsidi nya endang ari agih belanja iya dikena ngurang tating belanja rayat.
Inisiatif nya mega ku iya, mandangka pengeransing Parti Tindakan Demokratik (DAP) nyendia servis manah ke pemaik rayat.
