ENGKILILI: Kala enda nembiak rebak baru meda orang bemain meriam buluh baka kelia maya malam Gawai nyadi iya nya kena 31 Mei? ku tanya Tr Pendy Anak Gerang.
Dipelaba aku, mayuh nembiak rebak baru enda kala meda utai ke dikumbai meriam buluh, lalu kedua mega nyangka kala ninga nama tang enda nemu chara bemain.
Tuai Rumah ari rumah panjai Empelam, ditu madah, jeman iya nembiak suba las sida bemain merim buluh tu iya nya urung taun 1979.
“Kepenudi aku ngaga tu maya kami benung belajar ba Sekula Sekondari (SMK) Engkilili, dia kami sebakih bebaik enggau pangan diri ngaga meriam buluh.
“Bansa buluh ke dikena kami ngaga meriam tu iya nya buluh betong, pilih ke udah chukup tuai awakka enda mudah pechah.
“Udah nya, betong nya tadi diteba urung sedepa lebih pemanjai tauka bisi tiga buku ruas.
“Nangkan ke nya, betong tu tadi ditebuk gagaka lubang endur nuchul tauka ngiri minyak gas (minyak kerusin) iya nya minyak lampu kelita.
“Ba buku ruas nya lalu digagaka lubang dientung enggau kayu mesai tugal ke mit,”ku iya.
Iya ngelansa mulaika pengingat diri lebuh dirandau Suara Sarawak sentang siti ari pengawa lama ke kala dimainka bala nembiak tang diatu pengawa nya tau dikumbai punas.
Nampung cherita nya tadi, ku Pendy minyak api ke disalin ngagai lubang ke udah ditebuk tadi lalu didaing betong nya sampai minyak gas beguruk.
“Maya minyak gas udah begurak dia lalu diselup enggau sempun api, dia iya lalu meletup ngeluarka munyi ke chukup inggar,” ku iya.
Mulaika pengingat mega, ku Pendy kelia nadai tentu mayuh main ke dikena ngerindang diri baka bechulikka telefon pintar baka diatu.
Maya umur iya 7 taun mega, berintai sida ke nembiak nebah meriam buluh ba mua rumah. Chukup rindu amat ati ninga meriam meletup maya kami ngintu malam 31 Mei maya nya.
“Aku agi ingat, urung taun 70, an kelia nembiak kami serumah beraban ngaga meriam buluh dikena kami ngelai Gawai nyadi.
“Maya nya, rumah panjai kami endang betuaika apai aku empu, Tuai Rumah Gerang Anak Bukong,” ku iya.
Kelia ukai nya baka diatu, agi nadai bebelika merechun baka diatu. Nya alai meriam buluh nya mih digaga dikena ngelai Gawai nyadi, ku iya.
Kebendar pengawa bemain meriam buluh enda tentu likun laban letup ari buluh nya ulih merechik. Nyadi pechik letup tu tadi ulih ngasuh betu tauka ngasuh tachat enti kena mua. Nya kebuah pengawa bemain meriam enda tentu tau dimainka sengapa.
Diatu pengawa bemain meriam buluh enda dikemendarka perintah agi beduduk ari Akta Bahan Letupan 1957, tang taja pia nembiak rebak baru nyau nyau ngalih ngagai pengawa bemain merechun laban ke majak muntang bebelika merechun komersial lalu nya ngerichahka sebarang aja pengerami besai sekalika nya pengerami Gawai, Hari Raya tauka Taun Baru China.
