KOTA SAMARAHAN: Urung 10,000 pengawa puang bisi disedia nyerumba program Unimas Talent Recruitment and Career Exhibition 2019 (Trace).

Pengawa nya dipenyadika Chairman Komiti Direktor Unimas Tan Sri Datuk Panglima Sulong Matjeraie ba Arena Gemilang, Unimas.

Mandal Chanselor Unimas Profesor Datuk Mohamad Kadim Suaidi madah tu dibuka nengah 95 bengkah kompeni ari agensi perintah enggau swasta ngulu Trace.

“Trace tu dipejalaika ninting taun dikena nyadi jalai kompeni-kompeni besai ngiga orang baru ti bepenemu sereta landik lebih agi ari nembiak Unimas.

“Ukai semina nembiak Unimas, tang nembiak ari palan pelajar tinggi ke bukai ulih enggau pengawa tu laban bisi pengawa temuduga tebuka enggau taklimat kerjaya dipejalai,” ku Kadim.

Teks jaku nya dibacha Sapit Mandal Chanselor (Pengawa Pansik enggau Inovasyen) Profesor Dr Wan Hashim Wan Ibrahim ba pengawa bejadika Program Unimas Trace ba Arena Gemilang Unimas, kemari.

Kadim madah nengah Trace tu sida nyendiaka jalai ngagai pelajar ngambika ulih betanya enggau terus ngagai pengari kompeni.

“Kelimpah ari nya, sida pelajar mega ulih nanya pasal palan praktikal sida lebih agi ba taun penudi sida.

“Trace tu meri peluang ngagai raban akademik Unimas ngambika ulih berandau pasal pemansang akademik enggau pengawa ukai dipejalai ba dalam kampus ngagai raban industri,” ku iya nambah.

Seraya, Kadim madah Trace udah dipilih piak Time Higher Education (THE) nyadi finalis Oustanding Studen Support Award lalu bala pemenang anugerah besai ba renggat entarabansa tu deka dipadah di Abu Dhabi 30 April tu.

NERIMA… Sulong nyuaka replikas chek ngagai siku penerima ba pengawa Trace di Arena Gemilang Unimas, kemari.