Trend baru nyaga pengerai

“Nya kebuah, aum besai tu meri peluang ngaul kerejasama ba selampur ASEAN nengah penemu pengerai enggau ulih nyendiaka rentayan ti nempa peluang dagang nyaga pengerai chara digital sereta dagang berubat entara menua ASEAN.”

KUCHING: Pengawa milih Kuching nyadi palan ngatur Aum Besai Pengerai Chara Digital ASEAN 2019 endang pekara ti patut.

Kepala Menteri Datuk Patinggi Abang Johari Tun Openg madah, aum tu tau ngasuh pengerai enggau pengelantang temuai majak dikerindu lebih agi menua ke berimbai enggau Sarawak baka Kalimantan, Indonesia.

“Sida madahka aum besai tu ulih ngasuh kitai sedarka trend pemansang pemadu baru dalam industi nyaga pengerai dalam dunya digital enggau chara online lebuh sida ke landik bekunsika penemu pasal pengerai ari bala pakar ba menua ASEAN.

“Nya kebuah, aum besai tu meri peluang ngaul kerejasama ba selampur ASEAN nengah penemu pengerai enggau ulih nyendiaka rentayan ti nempa peluang dagang nyaga pengerai chara digital sereta dagang berubat entara menua ASEAN,” terang iya.

Abang Johari mansutka jaku nya rambau Aum Besai Pengerai Chara Digital ASEAN 2019 ti diatur Serakup Pedagang Asean-China di sebuah hotel tebilang, ditu ensanus.

Ngelansa pekara ti sama, Abang Johari mega ngelanchar aplikasyen MaNaDr Malaysia ke alai tu sebengkah aplikasyen ngambika pesakit ulih ngiga servis nyaga pengerai ari rumah.

Nengah aplikasyen nya, pesakit ulih berandau enggau diajar nengah video berubat enggau sida ti ulih dipechaya nyendiaka servis nyaga pengerai nya.

Nangkan nya, pesakit mega ulih bulih pemutus peresa darah nengah telefon binching.

Nyema begunaka sanding penemu tauka deka betemu enggau lutor, pesakit ulih ngena aplikasyen tu netapka haribulan sida deka ngagai klinik tauka pekara bukai.

Berebak enggau nya, Presiden Serakup Pedagang Asean-China Datuk Stanley Ling madah, aplikasyen nyaga pengerai nya deka mai Sarawak mansang ke mua dalam industri digital ngemujurka 47 perambu dalam inisiatif ekonomi digital ba menua tu.

Sama datai Menteri Kaunsil Kandang Menua enggau Pengawa Berumah Datuk Seri Dr Sim Kui Hian sereta pengari bukai.

Suara Sarawak