Trofi Krismas Apau Koyan nyintal penyerakup kaul entara nembiak

MURUM: Pekit main bol ngerebut Trofi Krismas Apau Koyan mengkang dikeandal nyadi pelasar nyintal penyerakup sereta ngering ulah bekerejasama entara rayat.

Kaban Kunsil Nengeri (Adun) Murum Kennedy Chuk Pai Ugon madah, pekit main bol ke diatur ninting taun nya diatu udah manggai 22 taun kelai ngerami Hari Krismas ba DUN dia.

“Seraya kitai ngemeranka daya pengidup bepengerai, nengah pekit tu mega kitai ditu ulih negut sereta nyintal penyerakup enggau pangan diri.

“Kelimpah ari nya, tu mega platform ke manah alai kitai ngatur kerejasama ba kitai,” pia ku iya madah maya pengerami nutup Piala Krismas Apau Koyan 2019 Ke-22 di Uma Lesong, Apau Koyan, Murum, ensana.

Pekit tu diatur Biro Raban Nembiak, Lumba enggau Main UMLES enggau Gerempung Main Bol Lakin Asap.

Kelimpah ari nya, pekit tu mega bela dikemujur Komiti Pengelikun enggau Pemansang Genturung Pendiau (JKKK) Uma Lesong.

Maya tu, Kennedy ngenataika jaku ngagai bala tim ke udah ngambi bagi ba pekit nya.

Gelar champian pekit diempu tim UMABASTER sepengudah ngalahka tim BAKOBA.

UMABASTER mega ngetanka gelar champian pekit nya ba pengelama tiga taun berunggu.

TEMEGAH… Pengari tim nerima perais seraya dikemataka Kennedy (tengah).