SERIAN: Alecia Tiara Herrie nurah sejarah kediri pengudah menggi gelar Kumang Gawai Siburan 2023 beserimbai Pengerami Ngiling Bidai enggau Pekit Kumang Gawai Siburan 2023, Kampung Sungai Barie, Serian kemari.
Dara bajik asal Kampung Sungai Barie mujur ngalahka tujuh pemekit bukai.
Pemujur tu ngujungka Alecia Tiara Herrie mai pulai perais mata duit RM2,000, jumpang khas sereta trofi.
“Gaga enggau enda ngadang ulih menang ba pekit tu laban semua pemekit chukup bajik enggau bepenau,” ku iya.
Nangkan nya, Lusiana Steward ngempu gelar Lulong lalu mai pulai mata duit RM1,500 nyengkaum trofi.
Dara bajik Alvina Dubrah bulih gelar Selinggar Matahari ke mega mai pulai perais mata duit RM1,000 enggau trofi.
Pengawa nyuaka perais ngagai bala pemenang udah dipenyadi ADUN Tarat, Datuk Roland Sagah Wee Inn ke mega Menteri Pelajar, Inovasyen enggau Pemansang Bakat.
Sagah mega chukup gaga meda pemujur pekit nya lalu madahka nya pekit tu semampai diatur lebuh Pengerami Gawai Dayak.
“Tabi puji nuju komiti pengatur ke udah mujur ngatur pekit enggau pengerami nya.
“Pekit tu mega ulih ngerapitka agi kaul enggau semua orang,” terang iya.
Sama datai tuai opis perintah sereta tuai genturung pendiau.
Pekit nya diatur Unit Saberkas Kampung Sungai Barie, Serian enggau kerejasama Komiti Pemansang enggau Pengelikun Genturung Pendiau (JKKK) Kampung Sungai Barie, Serian.
