SPAOH: Bala Tuai Komuniti enggau Tuai Rumah (KMKK) dipinta beratika kes Covid-19 bepun ari penusah rabat ke udah ngerampit 4,466 iku peranak ba menua tu.
Nya kebuah, Atur Pengawa Standard (SOP) mesti dititih ngambi nyaga pengelikun semua.
Nya meh jaku dikenatai Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas dekaka KMKK madah ngagai Opis Pelilih nyema bisi kes pemati tauka penusah rabat.
“Isu bekaul SOP kelebih agi ba penusah rabat enggau aktiviti rama ke begelumu mesti dikemerat.
“Reti iya, tuai bansa tauka tuai rumah mesti madah ngagai Opis Pelilih dulu enti sida serumah dituntung penusah rabat.
“Tu nentuka penatai mensia mayuh ulih dipatau laban pengawa baka tau ngasuh igi penyakit jampat ngerekai baka ke nyadi dalam Kluster Pasar.
“Naka diatu, bisi 22 kluster nyadi ketegal penusah rabat ba selampur menua enggau ngerikod 4,446 kes positif sereta 35 kes pemati,” terang Uggah.
Teks jaku Uggah nya udah dibacha Sekretari Politik Kepala Menteri, Dr Richard Rapu lebuh bejadika Bengkel Polis Komuniti dipasuk 49 iku KMKK, ditu kemari.
Terang iya, tuai komuniti ke puntan nentuka SOP dititih ba rumah panjai tauka genturung pendiau tau ngeruga pengelikun sida serumah.
“KMKK ulih dikompaun laban nya endang udah tanggung pengawa sida nyaga pengelantang anembiak iya.
“Ambika banding, apin lama berapa iku tuai rumah udah dikompaun RM2,000.
“Taja peranak menua pesisir udah mayuh nerima vaksin tang sida mesti ingat, nya ulih nyamin sida enda kena rampit kelebih agi pengerekai varian Covid-19 baru iya nya varian Delta ke jampat agi ngerekai,” terang iya baru.
Uggah ke mega Sapit Kepala Menteri sekali agi nesau mensia mayuh ke apin nerima vaksin dipinta rejister enggau lengkas.
