Tuai raban bansa patut nyempulang pejalai pengari rayat

LUBOK ANTU: Bala tuai raban bansa diperansang anang lembau nyempulang pejalai pengari rayat ngambika bela besaup beratika peminta enggau pekara ti nyadi ba menua diri.

Kaban Parlimen Lubok Antu Jugah Muyang madah, kaul nya besai reti dikena bejadi jaku tuai raban bansa nyadi jematan perintah besemak agi enggau rayat.

“Pengawa pengari perintah besai sereta kerejasama enggau sukung tuai raban bansa beguna bendar dikena nentuka pemansang ulih ditumbuh nitihka pelin.

“Ketegal nya, endang nyadi tanggungpengawa sida ngemeratka isu enggau pengelantang rayat nyengkaum nyaup perintah ngetanka pengelikun pengidup rayat pupu bansa,” pia ku iya madah.

Iya mantaika jaku tu maya ngulu Pengerami Mantar Gawai Rumah Nyambong, Serembai ditu, ensana.

RAMI: Jugah begambar begulai enggau peranak rumah panjai maya pengerami nya.

Jugah mega madah, bala tuai raban bansa anang ninggal ke diri ari pelin sereta perambu ke digaga tauka dipenyadi perintah besai.

“Kita mega anang enda meretika nama isu ke bisi nyadi ngambika atur pemansang perintah lantang digaga,” ku iya madah baru.

Nambahka jaku iya, ku Jugah, rayat di menua pesisir patut nemu perintah besai naka alah ngiga chara dikena ngangkatka tikas pengidup rayat.

“Anang ngumbai perintah Pakatan Harapan (PH) melakangka rayat tang perintah tu ninting maya deka meda rayat idup lantang.

“Tu terang mantaika PH bebendar mai rayat menua pesisir mansang agi,” pia ku iya madah.

Bekaul enggau pengerami sehari nya, iya madahka Gawai Dayak siti pengerami ti ‘signifikan’ laban ukai semina diintu bansa Iban aja tang mega bansa Dayak ke bukai baka Bidayuh enggau Orang Ulu.

“Gawai Dayak mega ukai semina pengerami aja tang dikelala hari alai negutka agi kaul komuniti,” ku iya madah.

Ba penegrami nya, Jugah ngungkupka RM80,000 ngagai Rumah Nyambong dikena ngemanahka rumah panjai sida.

Kelimpah ari nya, iya bela ngungkupka RM10,000 ngagai Komiti Pengelikun enggau Pemansang Genturung Pendiau (JKKK) Rumah Nyambong enggau RM5,000 ngagai Biro Raban Indu rumah panjai nya sereta RM10,000 ngagai tiap tujuh buah rumah panjai di genturung Serembai dia.

Suara Sarawak