Tuai rumah patut meransang rebak baru rinduka main asal

SIMUNJAN: Pengerembai main asal patut bepun ari bala tuai rumah meransang rebak baru ngembuan pengerindu ngemeranka pengawa lama nya.

Ketuai Akademi Gerempung Dayak Iban Sarawak Dayak (Asadia) Mabong Unggang madah, ari sukung enggau jaku peransang tuai rumah, rebak baru deka bisi agi pengerindu belajarka main asal baka ngajat.

“Enti tuai rumah bela ransing ngetanka main asal, kitai pechaya bala nembiak rumah panjai enda kakang belajarka main asal laban bisi tuai nyukung sida.

“Ukai semina nya aja, saup ari semua lebih agi baka sukung ari tuai rumah dia main asal kitai deka angkat pegari lalu nyadi pelasar ngempung bansa,” pia ku iya madah ngagai pengarang, kemari.

Dulu agi ari tu, Asadia mujur ngajar 18 iku nembiak ari Simpang Simunjan ngajat.

NGETAN MAIN ASAL: Mabong (empat kiba, duduk) enggau Tr Ningkan (empat kanan, duduk) sereta bala bukai begambar enggau bala nembiak ke udah tembu belajar ngajat.

Program tu disaup Raban Komiti Pengelikun enggau Pemansang Genturung Pendiau (AJKK) kampung Baru Simpang Simunjan ti betuaika Tuai Rumah Ningkan Langup ba pengelama dua hari.

Nambahka jaku iya baru, ku Mabong, iya berasai temegah amat ati meda pemeras AJKK genturung menua nya enggau tuai rumah sida nyukung bala nembiak belajar ngajat.

“Pemeras TR Ningkan enggau raban komiti iya patut dichunto genturung menua bukai.

“Ari pengeransing kitai deka ngetanka main asal, kitai ke tuai mega meseti ngepunka bala nembiak dulu,” ku iya.

Kelimpah ari nya, iya madahka program nya bela nerima sukung ari Menteri Muda Lumba enggau Main ke mega Kaban Kunsil Nengeri (Adun) Balai Ringin Snowdan Lawan.

Suara Sarawak