Tuak Sarawak digaga Kuin John nyamai sereta bekualiti

“Taun betukar taun, nyau makin mayuh ga resepi tuak aku, ari tuak pulut ke suah diirup kitai, aku diatu bisi enam bansa tuak. Tu nyengkaum tuak pulut, tuak pulut mirah, tuak bungai telang, tuak buah naga, tuak buah berunai enggau tuak roseela.”

KUCHING: Pengerindu bedagangka siti ari ai bisa bansa asal kitai Iban meransang siku anak Iban iya nya Kuin John ke benung diau di Semenanjung ransing ati bejualka bemacham leman produk ai tuak.

Kuin asal ari Rumah Mang, Sungai Wong madahka iya suah nyual tuak lebuh bisi pengerami diatur ba Semenanjung.

Lebuh ngepunka randau enggau Suara Sarawak, Kuin madahka tuju ati iya baka pedagang bukai mega dekaka produk asal bansa kitai di Pulau Borneo baka ai tuak tu dikelala bansa bukai.

Ku Kuin, menua kitai endang tampak rita ngembuan bemacham produk asal ke mengkang dikemeran sereta pengelandik nyendiaka bemacham bansa pemakai asal nya agi ditampung rebak baru diatu.

KENANG… Kuin begambar ungkup kenang enggau bala bukai ke bekenaka ngepan asal Iban.

“Kelimpah ari ngepan enggau budaya asal bansa Iban, ai tuak tu mega sebansa ai ke enda tau enda bisi maya bisi ngatur pengerami kelebih agi Pengerami Gawai Dayak enggau ke bukai.

“Nyadi, sebedau tu aku kala bedagangka bemacham produk pemakai asal kitai sebedau aku berengkah bedagangka ai tuak tu.

“Naka ulih mih aku berundingka chara ngiga belanja kelebih agi ba menua orang tu. Pia mega, pengawa bedagang tu nentuka aku ulih nitihka singkang orang bukai.

“Ba taun 2018, aku mutus ati badu gawa enggau China lalu keran deka ngaga tuak, tambah mega aku nerima mayuh peminta dataika aku enda ulih tetangkupka udar ari bala penguna.

“Aku mega ngembuan runding, manah agi gawa kediri, pia nyadi kuli pia nyadi bos ga laban gawa nitihka pengelantang diri.

“Baka ke ditemu kitai, tikas idup ba Semenanjung Malaysia tu chukup tinggi, nya kebuah aku mesti berundingka pemakai ke tau dijual dikena ngiga anak belanja ngidupka diri diau ba mengeri tu.

“Sebedau tu, aku kala bejualka pemakai asal kitai Iban baka penganan iri, sarang semut, kek lapis Sarawak enggau ke bukai.

“Aku endang rindu bedagang sereta nyema diau ba rumah, sigi berunding nama pemakai ke deka digaga dikena nambahka penatai pemisi,” ku iya nerang.

PUH BEDAGANG… Kuin mantaika ai tuak ke dijual iya ba sebengkah pengawa di Kuala Lumpur.

DAGANG TUAK

Kuin madah, bai ati rindu bedagang, dia iya enggau orang masuk ba Serakup Pedagang Borneo Seri Kembangan begulai enggau pedagang bukai ari Borneo mega.

Ku iya, sebedau ngaga ai tuak, iya kala ngaga pemakai asal baka penganan iri, sarang semut, kek lapis Sarawak enggau ke bukai.

Lebuh maya rumah asap di Cheras bisi tebuka, dia Kuin enggau orang ngeruh ai nyuwa stall lalu nguji ngaga laksa Sarawak enggau penganan iri.

“Pemuas ke bejualka pemakai baka laksa Sarawak enggau penganan iri, dia aku nemu kitai ari Sarawak, Sabah enggau Malaya rindu ngirup ai tuak.

“Ari nya, berunding ga aku, nadai salah ngaga ai tuak ni nemu mayuh orang ngudar, ku dalam ati aku.

“Lebuh terubah berunding deka ngaga ai tuak, aku endang enda nemu ngaga tuak.

“Suba, sebut ke nama chiping pan aku enda nemu, anang ke deka ngaga tuak.

“Nyau pemuas dagang aku makin enda maju, aku lalu nyurutka diri sereta badu bejualka pemakai di rumah asap.

“Aku mutus ati deka bedagangka ai tuak lalu minta ajar indai aku chara ngaga tuak.

“Nyau ke lama udah nemu ngaga kediri ari ajar indai, aku lalu ngaga resepi kediri empu.

“Taun betukar taun, nyau makin mayuh ga resepi tuak aku, ari tuak pulut ke suah diirup kitai, aku diatu bisi enam bansa tuak.

“Tu nyengkaum tuak pulut, tuak pulut mirah, tuak bungai telang, tuak buah naga, tuak buah berunai enggau tuak roseela.

“Enda lama agi, aku deka mansutka tuak baru laban aku deka nguji ngaga tuak buah oren enggau buah mangga.

“Dua bansa tuak ke deka digaga aku tu deka dijual nyerumba Hari Krismas ke deka datai,” ku Kuin nerang.

NYAMAI… Peranak menua luar ke datai ngagai Johor semampai meli tuak dijual Kuin.

NGAGA TUAK ARI RUMAH

Kelimpah rindu ngereja pengawa tu, Kuin madahka sukung ari laki iya meransang iya ngemajuka dagang ai tuak tu kelimpah pengawa ngaga tuak lempung agi dikereja laban disaup laki iya.

Kuin madah, pengudah belajar ari indai iya sentang proses ngaga tuak, iya lalu mupuk begadai ngaga resepi tuak kediri ba rumah iya empu di Kajang, Selangor.

Ku Kuin, ba pengawa bedagang tu, untung enggau rugi endang bisi, suba kadang nemu enggai nyadi tuak digaga iya.

Nambahka nya ku iya, kadang nyau nemu masam ngujungka tuak nya sigi dibuai aku pia aja laban enggai nyadi ga nyual tuak baka nya ngagai bala penguna.

“Enti dikira berapa pengerugi udah ketegal tuak nya enggai nyadi, sigi mayuh udah pelaba aku laban aku keran deka nyendiaka tuak ti bekualiti ngagai bala penguna.

“Nya kebuah, tuak dijual aku tu dikumbai tuak premium. Pengudah semua proses ngaga tuak nya tembu, aku deka nejuka tuak nya pengelama enam bulan dataika tuak nya chiru sereta bisi kualiti.

“Taja pedis ngaga tuak tu tang nadai sekali aku berunding deka ngaga pengawa nya tinchai laban bala penguna udah pechaya deka meli tuak ari aku.

“Tuak pemadu manah nya pengudah enam bulan, nya kebuah aku endang lama nyimpan tuak lalu enam bulan udah nya baru aku berengkah nyual.

“Nya kebuah, kita meda tuak aku tu chiru amat, nyamai sereta bisi kualiti.

“Enti ditanya pasal untung, kadang datai ga RM20,000 ngagai RM30,000 lebuh enggau orang bedagang maya bisi pengerami ditu,” ku iya nerang pasal gaya dagang ai tuak nya.

Kuin nyual sebutul tuak tu berega RM70 lalu ke bukai nya nitihka bansa tuak iya laban enti bisi ‘flavour’, mar agi ga rega iya.

Naka diatu, Kuin nyual ai tuak nya ba selampur Malaysia kelebih agi di Semenanjung Malaysia.

Iya mega madahka diri apin ulih tetangkupka peminta ari menua luar laban bedau kala nguji nganjung produk ai tuak tu ngagai menua bukai.

CHIRU… Pemanah tuak bungai telang enggau tuak pulut chelum dijual Kuin.

DAGANG TUAK LAKU

Kebuah pia laban iya apin nemu chara nganjung produk nya taja nerima mayuh peminta ari menua luar baka menua Jipun, Myanmar enggau India.

Tambah mega, Kuin madahka iya apin bulih lisin enggau chukai kastam laban tu produk belai sereta disimpan iya dalam butul kacha.

“Ai tuak tu disimpan aku dalam butul kacha, kira tusah mimit deka nganjung produk tu ngagai menua luar nangika pechah.

“Mayuh peranak ari menua luar madahka diri deka meli tuak aku, tang aku enda ulih nangkup peminta sida.

“Nya alai, aku semina nerima udar ari peranak menua luar baka orang India, China, orang ribai, orang ari menua Korea enggau Jipun ke diau ba Kuala Lumpur.

“Enda alah dirintaika aku nama enggau kemaya sida meli ai tuak tu, kadang sida ingat agi ke nama aku kelebih agi enti nyebut Kuin Tuak, lalu nemu mih sida nya tuak digaga aku.

“Baka pedagang bukai, dagang aku mega berupai kusut sekumbang pandemik Covid-19 laban maya pandemik tu mayuh kedai tutup.

“Ngelama tu, aku bedagang enggau bala bukai sebelah palan besai bebelika barang di Publika. Ninting bulan aku bisi muka palan endur bedagang lalu suwa sebulan dalam RM7,000.

“Tang sekumbang pandemik tu mayuh kedai tutup lalu enda ulih bejual baka selama.

“Nya aku berengkah bejualka produk ngena chap dagang ukir terabai laban ukir nya tau ngasuh bala penguna nemu aku tu ari Sarawak.

“Terima kasih nuju bala penguna ke suah meri timbal penemu madahka tuak aku nyamai diirup kelebih agi enti tuak nya diais dulu.

“Gaga amat asai ati sida madahka tuak digaga aku chukup nyamai sereta bisi kualiti.

“Lebuh Pengerami Gawai Dayak tu tadi, aku bisi ngaga promosyen beli tiga pechuma sebutul tuak berega RM220.

“Terima kasih ngagai semua penguna ke udah nyukung sereta meli tuak aku maya Gawai tu tadi, sebedau sebedau gawai aku sigi udah ngaga promosyen sebelah media rama baka Facebook enggau Instagram.

“Chukup mayuh orang ngudar dataika aku empu enda ngaga kuih enggau nyendiaka pemakai maya Gawai,” ku Kuin.

Taja dagang tuak Kuin makin laku, tang mayuh pemar ditapi iya sekumbang bedagang.

Kesatu nya, dua iku anak iya benung mekang besekula lalu nyau bendar ngintu ruang bilik lalu nyau jauh malam baru iya berumban ngaga tuak nya.

“Pengelelak enda ibuh disebut, kadang aku gawa kediri nyentuk jauh malam laban deka ngerumban nembuka udar ari bala penguna.

“Kedua nya, ngiga penguna tetap tuak aku. Dia aku nguji mai bakih aku ngagai palan semak Kuala Lumpur enggau Damansara dikena ngelakuka tuak aku.

“Ketiga nya, pemedis belajar kediri ngaga nama serikat aku empu lalu ngaga lisin sereta permit dagang enggau ngiga palan endur bedagang di Kuala Lumpur enggau Selangor.

“Nangkan nya, pemar ngaga tuak tu mega ari sukut ungkus sereta baka ni deka nyaga kualiti ai tuak nya ngambi nyamai sereta bisi kualiti,” ku Kuin nerang.

PRODUK ASAL… Produk asal dijual Kuin ba Semenanjung Malaysia.

JULUK ATI

Ku Kuin, iya endang ngembuan mayuh juluk ati baka deka muka kilang enggau ngulihka lisin ari perintah dikena ngaga tuak tu.

Tang ku iya, semua juluk ati tu ukai muntang dijapai munyi ku mulut nyebut tang nadai salah ga kitai nguji baka orang bukai.

“Naka diatu, aku endang bepanggai ba media rama baka Facebook enggau Instagram lalu ngena aplikasyen Boost.

“Kelimpah ari bedagang tuak, aku mega bisi nyual produk ari bala bansa Penan dikumbai bakul Penan enggau produk krafjari ari Sarawak.

“Nyau limpang, chukup gaga laban dagang aku makin maju diatu laban ukai mimit puku dikena aku suba, manggai RM5,000 dikena meli kereban baka tong, senduk, pemantis, talam, jug enggau ke bukai.

“Ba penemu aku, media rama tu chukup besai guna kelebih agi maya pandemik tu sereta enda ibuh betemu.

“Nya alai, barang sapa ke deka ngudar tuak tu, kita tau ngelawa Facebook Tuak Sun Borneo.

“Kepenudi iya, pesan aku nuju rebak biak, anang enggai bedagangka produk asal kitai Iban baka tuak tu laban produk tu narit ati peranak bukai sereta nerima peminta tinggi ari sida ke diau di menua luar,” ku Kuin nyimpul randau enggau Suara Sarawak.

BISI KUALITI… Ai tuak ke chiru dijual Kuin tu nerima mayuh peminta ari bala penguna.

 

TAU UJI… Barang sapa ke deka ngudar tuak tu, kita tau ngelawa Facebook Tuak Sun Borneo.

 

ANANG ENDA NGUJI… Bemacham bansa tuak dijual Kuin ungkup bala penguna.

Suara Sarawak