Tubuh bepapung ditagup baya Sg Telong

MIRI: Siku lelaki peranak Indonesia bebadi nyawa ditagup baya lebuh ngiga kangkung ba parit Ladang Tanjung Payung Tradewinds Plantation, Jalai Tebing Tasik Miri-Bintulu ditu, Hari Satu tu tadi.

Ba penusah nyadi urung pukul 5 lemai nya, niang Asbullah Daeng Situju, 37 taun, ditagup baya lebuh nurun ngiga kangkung ba parit ladang.

Ketuai Polis Pelilih Miri Asisten Komisioner Lim Meng Seah ngenukuka penusah nya madah, pengawa ngiga enggau nyelamat dipejalai pengereja ladang ke bukai pengudah sedarka penusah nya.

Ku iya, pagi hari siti pengudah penusah nyadi, urung pukul 11.57 pagi, siku ari sida ke gawa ba ladang nya tetemuka setengah tubuh.

“Pengereja ladang tetemuka kerat lengan kanan enggau setengah punggung sereta kerat kaki kiba dataika punggung.

“Kerat tubuh niang nya ditemu enda jauh ari endur penusah nyadi, besemak Sungai Telong,” ku iya ditu tadi.

Pia mega ku iya, bepelasarka pansik dipejalai, lebuh penusah nyadi bisi siku bakih niang ti sama ngiga daun babas meda iya ditagut siku baya.

Polis ngumbai kes tu mati ngenyit lalu bangkai niang udah dianjung ngagai Miri ngambika dipansik, ku iya.

KASIH… Kerat tubuh niang Asbullah ti ditemu rambau operasyen ngiga enggau nyelamat.