Tubuh niang Taid dianjung baya pulai

SIMANGGANG: Tubuh Taid Jepit, 61 taun ti dipelaba ditagup baya udah ditemu urung pukul 12.25 ngalihari lebuh bisi orang mudik ke ulu Batang Lupar, enda jauh ari Temelan Ulu.

Pegawai Raban Nyaga Orang Periman (APM) Sri Aman Kapten Siti Huzaimah Ibrahim udah ngenukuka berita nya tadi.

Ku iya, tubuh niang ditemu urung lapan kilometer (km) ari endur iya dipelaba lenyau dua hari ke udah.

“Tubuh niang ditemu bala ke benung ba rantau jalai mulaika diri ari Pasar Simanggang.

“Dulu ari nya, sida nya bisi tepedaka siku baya baka bisi manggum utai ngagai tebing ai.

“Udah nya sida lalu berumban minta sah raban APM ti benung bejalaika operasyen ngiga enggau nyelamat (SAR) enda jauh ari endur nya,” ku iya.

Siti madah, tubuh niang udah nya dibai ngagai pengkalan Batang Lupar ngena bot APM empu.

Suara Sarawak