Tuhan mantu Sarawak ngena otonomi imigresyen

KUCHING: Sarawak enda ngemendarka orang menua luar nyerara sereta mechah belahka penyerakup ba nengeri tu.

Kepala Menteri Datuk Patinggi Abang Johari Tun Openg madahka kitai ba Sarawak chukup untung laban kitai bela bebasaka pangan diri lalu nyeliahka penemu luar ti nguji deka mai penanggul ngagai menua tu.

“Tuhan mantu kitai, nya kebuah kitai bisi otonomi imigresyen,” ku iya.

Abang Johari madah munyi nya lebuh pengerami Bejadika Makai Lemai Sidang Injil Borneo (SIB) sereta bejadika Palan Besembiang enggau Komuniti di Palan Aum Penview (PCC) ditu, malam tadi.

Nangkan nya ku iya, Perintah Sarawak nadai pilih bukai tang neritka kuasa imigresyen sida ngagai orang ti nguji deka ngajum sereta mechahka kaul rayat.

BEJADIKA… Abang Johari (kanan) disempulang Uggah (tengah), Jabu (dua kiba), enggau Justin (dua kanan) lebuh bejadika projek begunan palan sembiang enggai komuniti SIB ditu malam tadi.-GAMBAR RAMIDI SUBARI

“Tu siti chara deka ngelindung kitai semua ari belaya baka ke dipeda kita ba menua bukai.

“Ny alai enti kitai deka mansang ke depan, kitai patut bisi siti pengentap runding ti nyerakup rayat ari tiap bengkah penatai asal kitai,” ku iya seraya madah Sarawak ngembuan rayat mayuh pupu bansa.

Ku iya, tiap iku rayat patut bebasa sereta rinduka pangan diri, baru pengelantang enggau penyerakup nya ulih nyadi.

“Pengarap kita, endang enggi kita. Lalu pia mega enggau aku.

“Tang, kitai patut bebasaka pangan diri taja bebida pengarap,” ku iya.

Rambau bejadika projek begunan palan besembiang enggau komuniti SIB nya, iya madahka projek nya diberi agih ti nadai bechiping.

“Kitai enda ulih terus ngelakka sida besembiang ba begunan kedai belama.

“Nya alai aku nyukung projek ngaga begunan baru tu ke kita,” ku iya seraya minta Sapit Kepala Menteri ti megai nyadi orang ti bisi tanggungpengawa ngagai Unit Pengarap Bukai (Unifor) Datuk Amar Douglas Uggah Embas mantu proses bejalaika projek nya.

Abang Johari mega madah endang udah nyadi tanggungpengawa Unifor ngiga jalai mantu pengarap bukai ba Sarawak.

“Pekara ti pemadu beguna iya nya kitai tetap beserakup lalu nyadi model Malaydia sereta enda nitihka pengawa sida di Malaya,” ku iya.

Kelimpah ari Uggah, bela bisi datai ba pengerami nya mega Penyanding Penemu Pansik Sains Sarawak ti mega nyadi Ex-Sapit Kepala Menteri Tan Sri Alfred Jabu Numpang, Kaban Parlimen Kapit, Datuk Alexander Nanta Linggi, Presiden SIB Datuk Dr Justin Wan enggau bala bukai.