SIBU: Tujuh ruang bilik ari 28 pintu peranak Rumah Bajai Nelson Surau, Sungai Durin Kanan ditu seruran enda jenak tinduk beratika sapat timbuk jalai ba kaki lima rumah panjai sida ke majak rungging.
Pengari rumah panjai nya madah, sida majak irau laban gaya hari ke suah ujan lalu ai meruan tama ngagai endur ke merekah.
“Kami semampai irau lebih agi maya ujan bangat laban nangika tanah tusur lalu nuju ruai enggau tiang rumah panjai.
“Enti penusah tu nyadi siang hari nyangka kami ulih ngadang tang enti malam hari…nadai sapa nemu nyema tanah tu tusur lalu tu tau bendar nganu nyawa,” ku iya.
Sapat nya digaga urung lapan taun ke udah lalu suah ditengah entukar.
“Arung rumah ke semak endur ke bisi merekah tu iya nya rumah dipenggu Banun Kudol, Darin Derabok, Glima Jacob Gindie, Unar Jacob Gindir, Donna Sanggu enggau Endu Julai,” ku iya nengah sebengkah penerang, tadi.
Kenu ku penerang nya mega, pekara nya kala dikenatai ngagai Datuk Sri Tiong King Sing nengah sekretari rumah panjai nya bulan Oktober 2020 tang nyentuk sehari tu lalu nadia sebarang timbal.
“Nya alai, kami sekali agi minta pengari rayat ke baru udah dipilih rayat mayuh (Tiong King Sing) lengkas ngesah penusah tu lalu ngaga atur ke patut sebedau penusah ke enda disadang nyadi,” ku iya.
