Tukang sumai landik ngaga kek macham gaya

SIMANGGANG: Landik di tunjuk jari enggau pemintar nengkebang utai kebendar bepanggai ba pemagas enggau pengepuh kitai ngereja pengawa nya.

Bai ati keran enggau angkunka genap pengawa dikereja, asil utai ditempa kitai tentu deka manah endang manding dipeda.

Tu kunchi pemujur siku Simanggang benama Mathew Brodie ari Tanjung Rirang Rumah Brandah ti matak perati penguna media rama ari asil kek ti chukup kreatif.

Ku Mathew, iya diatu gawa ke tasik nyadi tukang sumai enggau ngaga kuih.

Penyelai enggau pemanah ukir diturai jari Mathew ba kek digaga iya endang ngasuh ati tekait ti bechuanka ukir asal bansa Dayak Iban.

PUH…Kek beringkat baka tu tembu dua ngagai tiga hari laban ukir nya mar digaga.

Ngelansa pasal pengelandik ngaga kek tu, Mathew madahka diri belajarka chara ngaga kek tu ari indai iya.

“Indai aku endang ngaga kek enggau kuih kelebih agi lebuh bisi pengerami.

“Lebuh suah nulung indai ngaga bemacham bansa kek enggau kuih, aku lalu bisi pengingin ati deka ngaga kek,” terang iya.

Terang Mathew, iya mega suah meda video dikunsi ba youtube sentang chara orang ngaga kek dikena nambahka pengelandik enggau penau diri.

Taja pia, iya madahka diri nadai kala nerima latih tauka nyereta kus ngaga kek enggau kuih.

“Bai ati balat rinduka pengawa ngaga kek tu, aku suah meda program tv ti mantaika pengawa nyumai baka TLC, Cake Boss enggau Mastechef.

“Kelimpah ari meda program nyumai pemakai nengah Youtube, aku mega bisi meli bup resepi nyumai lauk enggau ngaga kek tauka pastri.

Nambahka nya, Mathew madahka diri landik ngaga bemacham bansa kek enggau ukir chukup nyelai lebuh iya gawa nyadi tukang sumai.

Pemanah ukir digaga Mathew patut dikemegah raban bansa Iban laban iya enggau naka ulih ngasilka kek ti mandangka pengeraja asal bansa kitai.

KREATIF… Kek Burung Kenyalang asil pengelandik jari Mathew matak perati penguna media rama.

Suara Sarawak