ARTIKEL

Tulis berita ngena jaku nitihka standard DBP

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

BEKUNSI PENEMU…Suhaimi (kanan) begambar kenang enggau Tuai Pemberita Suara Sarawak, Nick Fletcher pengudah ngenataika Licha ‘Menolak sempadan dan kekal relevan dalam industri media yang berubah’ diatur Suara Sarawak enggau New Sarawak Tribune di Balai Besai Lembaga Multimedia Sarawak (SMA), kilah ensanus.-Gambar Mohd Alif Noni

KUCHING: Pengerembai infomasyen ba pelasar digital diatu meri awak ngagai mensia mayuh nulis tang enda beratika leka jaku engkeman tauka mudah ditemu pemacha lebih agi baka berita Jaku Melayu.

Tuai Pegawai Eksekutif (CEO) Sarawak Media Group (SMG) Suhaimi Sulaiman madah, jaku nya nyereminka bansa lalu enti ulih penerang ti dibantaika nya mesti nguna jaku ti betul nitihka standard Dewan Bahasa Dan Pustaka (DBP).

“Ba aku, kitai mesti nemu nitihka rentak tang anang sesekali ngamahka jaku enggau bansa kitai.

“Nya kebuah, aku seruran pechayaka berita ti dibantai ngena jaku ti engkeman tang mudah ditemu nya nyata manah didinga tauka dikumbai kitai ‘classy’,” ku iya.

Suhaimi mansutka jaku nya lebuh dirandau pengudah licha ‘Menolak sempadan dan kekal relevan dalam industri media yang berubah’ diatur Suara Sarawak enggau New Sarawak Tribune di Balai Besai Lembaga Multimedia Sarawak (SMA), kilah ensanus.

Iya mega enda ngenggaika pengawa nguna jaku ti engkeman dikena nambahka ‘rega diri’ ngambi dibasa.

“Pekara ke besai agi nya kitai ngenataika berita enggau chara ti dibasa laban enti enda, kitai baka ngamahka nama diri, lenyau kredibiliti laban suba orang bebasaka kitai (jaku).

“Kitai enggaika orang enda bebasaka kitai laban nitihka rentak orang bukai enggau pulaika pengerugi ngagai diri empu,” ku iya nerang.

Suhaimi mega madah, media ‘arus perdana’ patut enda dikarang nitihka gaya jaku kolokuial (jaku dikena ninting hari) ngambi identiti nya ulih dijaga.

“Bepegai ngagai ‘jenama’ kediri empu laban bisi peluang pemacha rinduka ‘jenama kita’,” ku iya madah nyemetak.

Taja pia ku iya, pengawa nguna jaku pasar ti nyadi trend ba media rama engka setipak enggau peminta penguna pelasar digital.

“Enti sema sida rindu enggau gaya jaku pasar ke mudah enggau dikena ngelakuka sesebengkah pekara, utai nya ulih terus dikereja,” ku iya.

Suhaimi madah, pemberita diatu mesti nyikap diri enggau penemu nentuka sida ulih ngarang berita ti manah ngambi mengkang diterima dalam industri tu.

BERITA LAIN

BERITA TERBARU