‘Tum Ketumba’ ngerichah  Gawai Sungai Gudom

Kelai peninggi adat basa, pemintar runding

SRI AMAN: Kitai Iban kaya enggau leka main enggau main asal, ku Pemungkal Projek Pensel, Norina Umoi Utot.

Ku Norina, main asal Iban endang genap nitihka penuai umur, bisi main ungkup nembiak mit, nembiak rebak baru, orang bujang enggau orang besai tuai sereta sida ti udah lunggar umur.

Sekeda ari main asal kitai baka main kelugi, main sambut, main bit-bit inchi, main chai juai, main tampin abu, bepangka (gasing), bebatak lampung, bibat lengan, bintih patung enggau mayuh agi ti bukai.

“Seraya main asal pemerindang iya nya leka main ti bekaul enggau pengawa ti digaga bala Iban maya lemai hari tauka maya bisi betunga mua ba ruai.

NIKIKA PENGABANG… Penatai Norina enggau bala bukai diambat enggat ajat sereta tabuh.

“Lalu leka main tu dikena ngerindang jam, merindang enggau ngelantangka ati, bungah, muji, ngelugi enggau ngelangkung pangan diri enggau tuju ngerapitka tanggam kaul,” ku Norina ngelansa lebuh dirandau Suara Sarawak.

Iya mansutka jaku tu rambau pejalai ngabang Gawai Dayak di Kampung Melikin, Sungai Gudom, Balai Ringin, Sri Aman kena 6 Jun tu tadi, nangkup kangau ngabang ari peranak dia.

Ku iya, enti agi mit kelia, apin bisi radio enggau tibi, tu mih chara bala kami ti diau di rumah panjai nyerakupka kaul enggau pangan.

Bala nembiak mit, sida ke baru angkat bujang dara gagit nyelinting lemai hari, udah terenah, mandi enggau ngintu diri, endang begempuru duduk begelumu ba ruai nganti sida ke tuai nusui ensera tauka leka main bukai.

“Ensera tu sebagi ari main asal pemerindang ti ditusi pia aja enda benyawa, lalu enti iya ditusui ngena chara benyawa (dikana), dia ensera tu lalu dikumbai orang Pelandai.

NIKIKA PENGABANG… Penatai Norina enggau bala bukai diambat enggat ajat sereta tabuh.

“Ensera Keling enti dikanaka dikumbai orang Ensera Bujang Sugi,” ku Norina nikalka kenang diri agi mit menya.

Nampung penemu sida ke tuai ku Norina, leka main pemerindang tu nyengkum ai ansah, denjang, dindang, dungai, ensera, entelah, ganu, jaku berambai, jaku karung, pantun, pelandai karung, pelandai ara, puchau, ramban, renung semain, sugi semain enggau ti bukai.

“Nya kebuah aku rindu amat meda bala nembiak mantaika main tum ketumba. Chukup landik ngerintaika leka jaku peransang seraya mantaika juluk ati sida ngena jaku silup, bekarung ti alus didinga sereta ensuruk.

“Main tu disempulang tabuh enggau tempap gendang chukup manah didinga sereta ngasuh ati teperindang.
“Pengawa baka tu endang patut diterenak kitai ngagai rebak baru ngambika main asal enggau leka main kitai bansa enda punas, lenyau diseruyut jeman moden,” tandu Norina.

Iya madahka diri nemu silup jaku sida semenua ti randakka pemansang, dekaka penyikap perengka guna pemun baka jalai alun dirumban ba menua nya pulaika pengelantang semua.

DIPEBASA… Norina diangkat bejadika Gawai Dayak renggat Kampung Melikin, Sungai Gudom taun tu.

Chara sida mantaika peminta alus amat, nadai entu nyenggala minta tang nyentuk didinga lalu tu ngayanka peninggi basa sida ngagai bala temuai enggau orang ti dipebasa, ku Norina.

“Ba aku empu, tu adat basa pemadu tinggi, ngelalu enggau nikika bala pengabang ngena leka main ti jarang dipeda kemaya hari. Aku besemaya deka ngemai peminta tu ngagai piak bekaul sereta naka ulih nyaup sida dataika juluk tu nyadi nyata.

“Sentang basa ngagai temuai, aku chukup muji pemanah basa sida nyengkaum pengiruh enggau pengepuh sida semenua ngetanka main benyawa baka tu,” ku Norina temegah.

Nangkan nya ku iya, tu asil ari pemintar runding ba batang pengidup tauka daya idup kitai bansa laban daya idup kitai bansa suah bendar dipanchar ari penalam runding, peninggi adat, pengalus budi, pementas basa enggau pemai ulah ti meruan.

“Tu chara dikena kitai mandangka adat enggau basa ti dikearap deka ditampung rebak dudi sereta meri terima kasih ngagai semua peranak di menua nya ti udah ngangau ngabang sereta ngelalu penatai sida sebuat ngena ajat, enggau naka pengerami,” ku Norina nyimpul randau.

Sama datai ngabang Chairman PKR Pampang Sri Aman Yen Jebeni, Ketuai AMK PKR Pampang Sri Aman Lawrence Temba, Chairperson Gidsa Bonie Langkop sereta bala bukai.

NANGGAM KAUL… Sekeda peranak Kampung Melikin enda masau awak begambar enggau Norina nyadika pengingat dudi hari.

 

MANTUP PENGELENGGAU… Siku ari ‘nembiak’ kelas orang tuai ti ditumbuh Tim Projek Pensel ngandak penatai Norina.

 

TEPERINDANG… Norina disempulang bala bukai ngulu bala nembiak nyadaka leka main tum ketumba.