SIBU: Menteri Besai, Datuk Seri Anwar Ibrahim nesau deka meri agih belanja RM350 juta ungkup pemansang fasiliti pengerai ba Sarawak rambau Pengerami Gawai Dayak 2023 ba Kuching empai lama dikeandal ulih meri pemaik ngagai sitak Sibu.
Chairman Parti Sa’ati Rayat Sarawak (SUPP) Pampang Dudong, Kaunselor Wong Ching Yong ngarap agih belanja nya ulih dikena numbuhka palan riman tauka abis nadai ngaga palan riman satelit ba Sibu.
Ku iya, komuniti ba wilayah tengah andal nganti palan riman ditumbuh ditu laban ba Kuching udah bisi palan tungkul ati.
“Nengah agi belanja tu, aku ngarap Sibu ulih dipilih nyadi endur ti engkeman dikena numbuhka palan riman.
“Enti enda ulih numbuhka Palan Tungkul Ati ba Sibu ketegal Kuching udah bisi palan tu, abis nadai palan riman satelit patut digaga ditu.
“Pekara tu beguna amat dikena nyendia sekeda servis berubat riman ungkup bala pesakit riman ba wilayah tengah,” ku iya nyemetak.
Wong ti mega Penulung Sekretari Pengatur SUPP Besai mansutka jaku nya ba sebengkah penerang dikena meri timbal ngagai tesau Anwar bekaul agih belanja RM350 juta ari Perintah Besai dikena numbuhka palan riman ba Sarawak.
