Tumbuhka balai jaku Iban – Jantan Umbat

KUCHING: Penumbuh sebuah balai jaku Iban endang patut diperunding laban nya sebagi ari chara kitai ngetan enggau negapka agi pengerembai jaku Iban.

Pegawai Pemansik ba Unit Sejarah Cherita Tuai, Yayasan Tun Jugah, Jantan Umbat madah nadai sebuah institusyen ti beempu tanggung pengawa ngintu sereta ngemataka pengerembai jaku Iban nya siti ari pekara ti amat beguna kemaya hari tu.

Ku iya ke mega ex-pengajar pekara tu patut bendar ditumbuhka awakka nyamai alai bala pengena jaku Iban betanya lebuh betempuh enggau penanggul dalam pengawa ngemansangka jaku Iban.

“Kebuah iya baka nya, laban beratika penyampat jaku Iban ngerembai kemaya hari tu ketegal udah mayuh media rama ngena jaku Iban, nya alai suah bala betekalat ngiga endur betanya baka penanggul ba jaku Melayu ke ditanya ngagai ‘Dewan Bahasa dan Pustaka’.

“Enti palan tu mujur ditumbuhka, dia bala Iban ulih ngelumuka raban sida ke dalam penemu ba jaku Iban begulai merambu pengawa baka nyalin sereta nengkebang leka jaku baru nambahka leka jaku asal enggau ke tulin ti udah bisi dikena nangkup guna kemaya hari tu kelimpah ari ngiga belanja dikena ngatur pengawa ke deka nyelak baru pesaka bansa kitai baka bup-bup lama ti ngundan adat, leka main enggau pengingat tuai nguna atur sepil jaku Iban standard ke diguna ba palan pelajar kemaya hari tu,” ku iya lebuh dirandau pemberita apin lama ke udah.

Dulu ari tu, nengah Portal Sarawak Voice, Jantan bisi mansutka penemu pasal sekeda pekara ke balat ngeruga sereta ngujungka jaku Iban majak bebalut di menua tu.

Kesatu, ku iya, pekara ti meri pangka nya bekaul enggau ulah penguna media rama ke rindu ngena leka jaku puntang lebuh ti nganjung jaku pesan pandak (sms).

“Ari pengawa nganjung pesan pandak nya, sepil ti betul nyau dikedut lalu ayat ke diguna nyau kelalu pandak ngujungka pesan nya enda nyentuk lalu enda ulih diperetika penerima,” ku iya.

Kedua, ku iya, siti ari kebuah penasal jaku Iban nya beduduk ari pemindah komuniti Iban ari rumah panjai ngagai mengeri ti nyau enda ingat agi ka chara idup di menua pesisir.

“Pengudah datai di mengeri, pengidup sida nyau berubah laban besaruk pendiau enggau mayuh pupu raban bansa bukai lalu entara jaku ke chukup semak enggau jaku Iban iya nya jaku Melayu.

Nya alai, ketebal agi bala rebak baru nyau ngena leka jaku ke balat bechampur enggau jaku bansa bukai.

Kebuah bukai iya nya, pengawa ke betampil beringgap enggau bansa bukai ti ngujungka jaku dikena nya balat agi bebalut. Nya alai, tu siti ari pemar ke patut diputar nengah lalau tauka peransang awakka iya enda majak marit penulin jaku Iban ke dikena besehari-sehari.

Berebak enggau nya, Jantan ngarapka bala pengajar, bala pemesai, raban pengerembai media enggau mensia mayuh naka ulih meransang diri ngena jaku Iban ke standard awakka nya nyadi ke malin mensia mayuh kelebih agi nembiak rebak baru.

Suara Sarawak