Tumbuhka 'Faith Garden' penabat diri sebilik nyerumba pengerekai pandemik Covid-19 – Mutang Tagal

KUCHING: Pedagang Orang Ulu patut ngambi peluang ba pengawa mansutka pemakai lalu nanam kediri asil pemakai kelebih agi lebuh napi pengerekai igi penyakit Covid-19 tu.
Presiden Balai Dagang enggau Industri (OUCCI) Datuk Mutang Tagal madahka, peluang ngaul diri ba pengawa mansutka pemakai tu siti chara ti likun lebuh penanggul dibai pengerekai igi penyakit Covid-19 kelebih agi enti sema ekonomi menua ditutup jemah ila.
“Enti rayat bisi mimit tanah ti ulih alai sida bekebun, sida ulih numbuhka siti kebun ke dikumbai ‘Faith Garden’ – Food Always In The House.
“Reti kebun tu iya nya ngambi nyadika penabat diri sebilik iya nya rayat ulih nanam semua utai tumbuh ti ulih nyadi pemakai lalu pemakai nya seruran bisi disediaka ngagai ruang bilik taja napi penusah lebuh pengerekai igi penyakit Covid-19,” ku iya lebuh randau eksklusif begulai enggau Suara Sarawak ditu, apin lama ke udah.
Ku iya nambah, sida ulih nanam sayur baka kangkung, changkuk, ensabi, ubi, kubis tauka terung Iban ti ulih meri asil sepemanjai taun nya.
“Kelimpah ari nya, enti sida bisi tanah ti besai agi alai sida ulih ngereja pengawa nupi manuk tauka itit, sida tau bulih asil pemakai dagin lalu enti bisi lebih ari asil nya tau dijual sereta bulih penatai pemisi lebih ari asil nya,” ku iya.
Mutang mega madahka, orang ti ngaul diri ba pengawa mansutka pemakai enda kala rugi laban pemakai endang pekara ti diguna mensia baik nya lebuh penusah tauka enda.
“Kelebih agi lebuh pengerekai igi penyakit tu, kitai endang patut bejalaika pengawa betanam betupi kediri lalu nyual asil nya ngambika bulih untung.
“Ambika chunto, menua baka Thailand, Kemboja enggau Vietnam nadai agi eksport berau sida ngaga menua kitai lalu tu kebuah kitai mesti bisi inisiatif mansutka pemakai kediri.” ku iya,
Ba lansa ke sama, Mutang madahka komuniti Orang Ulu deka bulih penguntung ari pengawa mindahka indu mengeri Indonesia ari Jakarta ngagai Kalimantan Timur berimbai enggai mengeri Balikpapan sereta Samarinda.
“Pengawa mindahka indu mengeri nya manah ungkup komuniti Orang Ulu laban enti jalai deka digaga dikena nyambung Sarawak enggau Kalimantan, kitai tau bulih penguntung ari sukut ekonomi.
“Nya mega deka ngemuntangka Perintah Sarawak berandau enggau Perintah Indonesia,” ku iya.
Nerang silik bekaul pekara nya, Mutang madahka sekeda ari endur pengentap Orang Ulu di Indonesia baka Tarakan, Nunukun enggau Malinau semak enggau indu mengeri nya.
“Kelimpah ari nya, Long Bawan di Kalimantan berimbai enggau menua Ba’ Kelalan lalu tu deka nyungkak ekonomi di Sarawak kelebih agi ngagai komuniti Orang Ulu,” ku iya,