Tumbuhka wang turu industri filem

KUCHING: Industri filem ba menua tu patut diberi peluang enggau sukung sama enggau industri menua bukai.

Siku Produser filem peranak Sarawak, Harry Frederick Dilgin madahka industri filem ba menua tu patut bisi bantu ari sukut belanja tauka pinjau ngambika ulih ngemujurka industri filem kelebih agi ba sida pengiat filem Sarawak.

“Ungkus dikena ngaga sebuah filem ukai mimit, paling kurang pan ratus ribu lalu enti begunaka mayuh perengka ulih manggai bejuta ringgit.

“Nya alai, aku ngarapka Perintah Sarawak ulih numbuhka siti wang turu ti ulih ngasuh sida pengemeran filem tu minjau nyengkaum ari sukut perengkaguna dalam sida ngaga filem,” ku iya madah nyemetak.

Harry madah munyi nya lebuh dirandau pemberita di opis Suara Sarawak ditu, ensanus.

Harry Frederick Dilgin

Nangkan nya ku iya, Serakup Pemansang Filem Nasional (Finas) endang ngembuan bantu belanja ti ulih mantu sida pengiat filem.

“Taja pia, bantu nya deka diagih ngagai semua pengiat filem di selampur Malaysia,”ku iya nerang.

Kelimpah ari nya, Harry madahka Sarawak ngembuan rampa menua ke manah alai ngaga filem.
“Ukai nya aja, nembiak rebak baru menua kitai mega mayuh penau dalam industri filem tu.

“Tang endang pengerugi ba industri filem kitai di Sarawak ketegal nadai chukup bantu belanja sereta atur di chukup terit,” ku iya madah.

Udah nya ku Harry, enti sema Perintah Sarawak ulih numbuhka wang turu tu, tu ulih ngurangka pekit berebutka bantu ari Finas kelebih agi entara pengiat filem Sarawak enggau Semenanjung Malaysia.

“Tu sekaligus ulih ngangkatka industri filem Sarawak seraya mandang ngagai mensia mayuh chara main asal, adat enggau mayuh macham bansa ba menua kitai,” ku iya ti mega ngembuan siti kompeni Silver Halides Pictures Sdn Bhd.

Nya alai iya ngarapka Perintah Sarawak ulih beratika pekara nya laban nya ukai semina ulih ngangkatka nama industri filem tang mega nama Sarawak.

Harry siku orang ke chakah ngaul diri dalam industri filem ba Sarawak.

“Aku berengkah enggau industri tu bepun ari pengawa ke mit-mit.

“Keterubah iya, aku ngaul diri enggau iklan, filem mit sereta klip video lagu begulai enggau artis menua tu mega,” ku iya nusi peneleba diri.

Ku iya, iya mega kala ngaul diri dalam iklan begulai enggau siti kompeni besai Malaysia sereta nguji ngangkatka nama enggau main asal Sarawak nengah nya.

Diatu, Harry benung nembuka siti projek filem menua ti nusi gaya pendiau orang menua tu kebendar nengah filem nya.

Suara Sarawak