Tunda mih pemerani Kanang

KUCHING: Taja filem ‘Kanang anak Langkau: The Iban Warrior’ ditengkebang siku pengarah tebilang Bade Azmi kurang nerima sambut tang reti pemerani anak Iban mujur dibantaika dalam filem nya.

Pegawai Waran II June Ba-i siku soldadu ti gawa ba Kem Penrissen Batu 8 madahka jalai cerita filem niang Kanang endang manah sereta mujur ngeruntun ati sida ti meda kelebih agi ba ujung cerita Kanang ti kena timbak munsuh.

“Taja pia, pelakun ti ngelakunka filem tu engka enda ulih mai cerita tu sebaka enggau penusah ti ditapi sida maya nya.

“Pemerani anak Iban iya nya Kanang dalam filem tu endang nyadi siti kelai ti mai reti besai ngemegah bansa Iban,” ku iya.

June mansutka penemu nya lebuh dirandau pemberita Suara Sarawak apin lama.

Pegawai Waran II June Ba-i

June empu ti madah masuk soldadu ba taun 1999 madahka semengat tinggi ti dibantaika Kanang patut dikembuan semua rayat Malaysia dalam ngetanka menua.

“Pengelikun menua patut ditanka ngambi enda mudah dikeruga orang bukai laban kitai udah lama lepas ari pegai bansa bukai kenyau 62 taun ti udah.

“Tunda mih ulah Kanang ti ngempu pemerani ngelaban munsuh sereta liat ati nitihka jaku peransang ari niang empu ‘Agi Idup Agi Ngelaban’,” ku iya.

Tandu iya, enda ngira cherita Kanang tu digaga ba bup tauka filem sejarah Kanang deka meruan dikenang sereta dipebasa belama-lama iya laban pemerani Kanang empu ti enda takut ke munsuh.

“Tusi ngagai anak sereta peturun kitai pasal cerita Kanang tu ngambika sida tau nemu tauka ngelala siku ari bujang berani Iban.

“Komuniti Iban anang enda ngenang jasa ti diberi Kanang ngagai menua maya ngetanka menua kelia laban ketegal iya meh kitai ulih begulai sejalai baka diatu,” ku iya.

Filem ‘Kanang anak Langkau: The Iban Warrior’ digaga ngena ungkus belanja RM3.5 juta dikeluarka Tangan Seni Sdn. Bhd.

Dipandangka ba taun 2017 filem tu enda ulih pechah panggung laban semina ngumpul pengulih kurang ari RM300,000 nitihka selinting sida.

Filem ‘Kanang anak Langkau: The Iban Warrior’.