Tunda pengeransing Bonnie Bunyau – Ali

SARATOK: Pengeransing jaguh angkat berat para, Bonnie Bunyau Gustin ngulihka juluk ati tau lalu patut nyadika teladan ngagai semua kitai.

Sapit Menteri Pengeluar Kuasa enggau Pengeraja Asal, Datuk Ali Biju madahka pemujur atlit para nya mechahka rikod dunya lalu bulih midul emas ukai pengawa muntang.

Ku iya, pejalai Bonnie ba lumba angkat berat tu ukai baru setaun dua lalu mayuh penguji udah diasai enggau ditapi tudah.

“Bonnie kala masuk pekit kategori 65 Kilogram (kg) ba Lumba Para Asia 2017, dientudika Lumba Komanwel 2018, kategori sama lalu bulih lumur empat ba kededua pekit nya.

“Udah nya Bonnie nguji baru enggau orang bepekit ba Para Asia 2018 Kategori 65 Kg lalu mujur bulih midul pirak sereta midul emas ba Nursultan 2019 World Championship Kategori 65 Kg.

“Kitai mega temegah ati lebuh igat Bonnie menang midul emas ba Pekit Mangkul Dunya Angkat Berat (Powerlifting) Para Dunya di Bangkok, Thailand dalam bulan Mei taun tu tadi.

NYADI CHUNTO… Bonnie Bunyau Gustin semampai nyaga disiplin diri empu nentuka juluk ati iya nyadi nyata.

“Lebih manis agi lebuh kitai nerima berita malam tadi (kemari), ke alai iya ukai semina bulih midul emas aja tang mega mechahka rikod dunya ba Kategori Lelaki 72 kg ba Pekit Mangkuk Dunya di Dubai,” ku iya lebuh dirandau Suara Sarawak.

Nya alai ku Ali, tu chunto pemadu manah ngagai ngagai semua kelebih agi rebak baru, anang mantul ngapa enti deka ngulihka utai dijuluk ati.

“Disiplin entara kunchi pemujur ba semua pengawa. Baka Bonnie tu, iya chukup nyaga ulah enggau disiplin diri taja tudah nyelai pendiau sereta enda besekula tinggi.

“Tang iya udah nunjukka diri empu ulih nyapai penyulut ba tikas dunya ari disiplin, pengepuh enggau pengeransing iya.

“Baka jaku sempama, tekura enda nikal ngapa seagi enda tepantup ba bandir. Bonnie tu tau nyadi ‘role-model’ rebak baru,” ku iya madah nyemetak.

Ngena peluang nya, Ali meri tabi puji ngagai Bonnie ti udah mai nama menua pegari ba mata dunya lalu ngarapka iya semampai bulih pemujur.

Ke penerang, Bonnie udah dipilih bepekit ba Lumba Paralimpik Dunya di Tokyo 2021 ke mega nyadi juluk ati iya ngelama tu.

Suara Sarawak